հինգշաբթի, 5 մարտի 2009
ՀՀ վարչապետ Տիգրան Սարգսյանն այսօր ընդունել է Արաբական Միացյալ Էմիրությունների արտաքին առևտրի նախարար Շեյխա Լուբնա բինթ Խալեդ Ալ Կասիմիին և նրա գլխավորած պատվիրակությանը։
Ողջունելով հյուրերին, վարչապետը հույս է հայտնել, որ արտաքին առևտրի նախարարի գլխավորած բավականին ներկայացուցչական այցը մեր երկիր նոր խթան կհանդիսանա հայ-էմիրաթյան հարաբերությունների հետագա զարգացման համար։ Տիգրան Սարգսյանը նշել է, որ արդեն իսկ տեղյակ է Հայաստանում համապատասխան նախարարությունների ու գերատեսչությունների հետ պատվիրակության ունեցած հանդիպումների, քննարկումների մասին՝ հավաստելով, որ ՀՀ կառավարությունը պատրաստակամ է հնարավորինս օժանդակել փոխշահավետ համատեղ ծրագրերի մշակմանն ու իրականացմանը։
Շեյխա Ալ Կասիմին ընդգծել է, որ պատվիրակությունը, որի կազմում կան նաև գործարարներ երեք էմիրություններից, չափազանց տպավորված է Հայաստանի տնտեսական զարգացման հնարավորություններով և պատրաստ է համագործակցել ու ներդրումներ կատարել ամենատարբեր ոլորտներում։ Նախարարը նշել է, որ ծրագրերի փաթեթը, որ տանում են իրենց հետ, քննարկելու են նաև էմիրությունների ավելի լայն գործարար շրջանակների հետ։
Շեյխա Ալ Կասիմին ՀՀ վարչապետին ծանոթացրել է նաև ֆինանսական և տնտեսական ճգնաժամի հաղթահարման ուղղությամբ Արաբական Միացյալ Էմիրություններում ձեռնարկվող քայլերին։
Որպես երկկողմ տնտեսական համագործակցության առավել հեռանկարային ոլորտներ, կողմերը նշել են բարձր տեխնոլոգիաների, էներգետիկայի, մասնավորապես, այլընտրանքային էներգետիկայի, գյուղատնտեսության, զբոսաշրջության բնագավառները։ Կարևորվել է նաև համագործակցությունը բանկային ոլորտում։
Վարչապետ Տիգրան Սարգսյանը նշել է, որ տնտեսության, առևտրի, գիտության, կրթության, մշակույթի և այլ բնագավառներում երկու երկրների միջև համագործակցության խթանմանը էապես կնպաստի նաև հայ-էմիրաթյան միջկառավարական հանձնաժողովի ստեղծումը։
Օգտվելով առիթից, վարչապետ Տիգրան Սարգսյանը խնդրել է նախարարին՝ ԱՄԷ-ի վարչապետ Շեյխ Մուհամմադ բին Ռաշիդ Ալ Մաքթումիին փոխանցել իրեն հարմար ժամկետում Հայաստան այցելելու հրավերը։
