երկուշաբթի, 23 մարտի 2009
Մարտի 21-ին և 22-ին Ծաղկաձորում տեղի է ունեցել Հայաստանի ազգային մրցունակության հիմնադրամի (ՀԱՄՀ) հոգաբարձուների խորհրդի նիստ, որը վարել է խորհրդի նախագահ, ՀՀ վարչապետ Տիգրան Սարգսյանը։
Խորհրդի անդամ և հրավիրված պետական ու մասնավոր հատվածների ղեկավարների մասնակցությամբ նիստում քննարկվել են հակաճգնաժամային և ներդրումային ծրագրերի իրականացման հետ կապված` մասնավորապես, e-governemant (էլեկտրոնային կառավարություն), Սպիտակ քաղաքում «Վարպետաց թաղամասի» ստեղծման, Տաթևի վանական համալիրի կառուցման և այլ նախագծեր, կրթական ոլորտում ծրագրերի իրականացման հարցեր։
ՀՀ վարչապետ Տիգրան Սարգսյանը նշել է, որ հաշվի առնելով ներկայիս համաշխարհային ֆինանսական և տնտեսական ճգնաժամի հետևանքով աշխարհում և Հայաստանում ստեղծված իրավիճակը, անհրաժեշտություն է առաջացել հստակեցնել ռազմավարությունը, որպեսզի Ազգային մրցունակության հոգաբարձուների խորհրդի գործողությունները ևս համահունչ լինեն ստեղծված իրավիճակին։ «Կարևորը հայ ժողովրդին համախմբելն է` կարևորագույն ծրագրերի կատարման համար», -նշել է վարչապետը։
Մարտի 22-ին Հայաստանի ազգային մրցունակության հոգաբարձուների խորհրդի նիստը շարունակվել է աշխատանքային խմբերում։
