ուրբաթ, 3 ապրիլի 2009
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Սիմոն Տեր-Սիմոնյանը։
Հանձնաժողովը քննարկել է 5 բարեգործական ծրագիր։ Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող «Հայաստանի Հանրապետության Կոտայքի մարզի Մրգաշեն գյուղի մանկապարտեզի մասնակի վերանորոգում», «Երևանի քաղաքապետարանի «Սուրբ Աստվածամայր բժշկական կենտրոն» ՓԲԸ-ի ծննդատան մանկաբարձական բաժանմունքի ծնարանի հիմնանորոգում», «Հայաստանի Հանրապետության Տավուշի մարզի սահմանամերձ գյուղերի ոռոգման համակարգերի վերակառուցման նախագծում» և «Հայաստանի Հանրապետության Լոռու մարզի Արծնի գյուղի միջնակարգ դպրոցի աջակողմյան ուսումնական մասնաշենքի հիմնանորոգման և արդիականացման նախագծում» ծրագրերը։
«Բարեկեցություն» բարեգործական հիմնադրամի կողմից իրականացվող «Լեռնային Ղարաբաղի Հանրապետության Ստեփանակերտ քաղաքում նոր բազմաբնակարան բնակելի շենքի շինարարական աշխատանքներ» ծրագրի նպատակն է Ստեփանակերտում զինծառայողների և նրանց ընտանիքների համար բազմաբնակարան բնակելի շենքի կառուցումը։
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր։
