երեքշաբթի, 14 ապրիլի 2009
Այսօր ՀՀ կառավարության նիստերի դահլիճում տեղի է ունեցել Արտադրանքի և ծառայությունների որակի ապահովման բնագավառում ձեռք բերած նշանակալի արդյունքների, ինչպես նաև որակի կառավարման արդյունավետ մեթոդների ներդրման համար ՀՀ կառավարության 2009թ. մարտի 19-ի որոշմամբ 2008թ. մրցանակի արժանացած մեկ տասնյակ ընկերություններին մրցանակների հանձնման արարողությունը։
Շնորհավորելով բոլոր մրցանակակիրներին և հանձնելով պարգևները, ՀՀ վարչապետ Տիգրան Սարգսյանը նշել է, որ հանձնաժողովը չափազանց խստապահանջ է եղել որակական հատկանիշները գնահատելիս։ Նա կարևորել է, որ մրցույթը եղել է բաց ու թափանցիկ և հայտ ներկայացրած ու հաղթող ճանաչված բոլոր կազմակերպությունները` օբյեկտիվ չափանիշներով քննության շրջանն անցնելով, կարողացել են ապացուցել իրենց գերազանցությունը։ «Այս գեղեցիկ ավանդույթի նպատակն այն է, որ խթանենք որակի բարձրացումը ՀՀ-ում և հանրության ուշադրությանը ներկայացնենք այն կազմակերպություններին, որոնք հասել են որոշակի հաջողությունների։ Եվ, բնականաբար, դա նպատակ ունի խորացնելու մրցակցությունը ՀՀ-ում։ Ես վստահ եմ, որ հաջորդ տարի մասնակիցների քանակը կլինի ավելի շատ, մրցակցությունը` ավելի թեժ, արդյունքում կշահենք մենք բոլորս` Հայաստանի Հանրապետության քաղաքացիները», - ասել է վարչապետը։
Մեկ անգամ ևս շնորհավորելով բոլոր հաղթողներին, ՀՀ կառավարության ղեկավարը բեղմնավոր աշխատանք է մաղթել նրանց` ի շահ մեր ժողովրդի։
