երեքշաբթի, 5 մայիսի 2009
ՀՀ վարչապետ Տիգրան Սարգսյանն այսօր «Էրեբունի -Պլազա» հյուրանոցային համալիրում մասնակցել է ՀՀ կառավարության, ՀՀ կենտրոնական բանկի և «Մեդիամաքս» լրատվական գործակալության կողմից կազմակերպված «Ես հաղթահարում եմ ճգնաժամը» մրցույթի արդյունքների ամփոփման և մրցանակների հանձնման արարողությանը։
Շնորհավորելով մրցույթի բոլոր մասնակիցներին և հաղթողներին` առաջին երեք տեղերը զբաղեցրած Հայաստանի և Արցախի բուհերի տնտեսագիտական ֆակուլտետների ուսանողներին, վարչապետը կարևորել է նման նախաձեռնությունները, որոնք, ըստ նրա, համահունչ են կառավարության ծրագրերին և նպատակ ունեն խրախուսելու հետազոտական աշխատանքները երիտասարդության շրջանում։
«Դա մեզ համար էական և հիմնարար սկզբունք է` այն առումով, որ եթե 21-րդ դարը լինելու է մտագործունեության դար, ապա այն ազգերն են ունենալու հարաբերական մրցակցային առավելություն, որոնք կկարողանան իրենց ներսում բացահայտել ինտելեկտուալ ներուժ, վերլուծական կարողություններ, ձգտում դեպի գիտությունը, գիտելիքը, ինքնուրույն ձևակերպել պրոբլեմները, խնդիրները և լուծումներ գտնել այդ խնդիրներին, առաջին հերթին` հետազոտական կարողությունները զարգացնելով։ «Մեդիամաքս»-ի այս նախաձեռնությունը հենց այդպիսի խթաններ է ստեղծում, որովհետև երիտասարդները հնարավորություն ունեն ամենաբարձր մակարդակով ներկայացնելու իրենց մտորումների արդյունքները, և դա, բնականաբար, խրախուսվում է պետության կողմից, հետաքրքրություն է առաջացնում հետազոտական աշխատանքների նկատմամբ։ Իհարկե, ցանկալի է, որ այս օրինակը լինի վարակիչ, որպեսզի շատ երիտասարդներ ցանկություն ունենան զբաղվելու հետազոտական աշխատանքներով։ Կարծում եմ, որ այս ձեռնարկն այդպիսի լուրջ խթան է պարունակում, և մասնավոր հատվածի այլ գործընկերներ նույնպես կնախաձեռնեն նման կարևոր միջոցառումներ, որոնք ևս կստանան պետության աջակցությունը», - ասել է վարչապետը։
