ուրբաթ, 15 մայիսի 2009
ՀՀ վարչապետ Տիգրան Սարգսյանն այսօր ընդունել է ՌԴ կառավարության նախագահի տեղակալ Սերգեյ Իվանովին և իր գլխավորած պատվիրակությանը։
Հանդիպման սկզբում Սերգեյ Իվանովը ցավակցություն է հայտնել «Նաիրիտ» գործարանում երեկ տեղի ունեցած վթարի կապակցությամբ և պատրաստակամություն` հայկական կողմին ցուցաբերելու հնարավոր աջակցություն։
Հանդիպման ընթացքում վարչապետ Տիգրան Սարգսյանը գոհունակություն է հայտնել ՀՀ և ՌԴ միջև փոխգործակցության բարձր մակարդակի առթիվ և նշել, որ հայ- ռուսական հարաբերություններում չկա մի ոլորտ, որտեղ չիրականացվեն համատեղ նախագծեր։ Հայաստանում գործում է հազարից ավելի համատեղ դրամագլխով ձեռնարկություն, և Հայաստանի կառավարությունը պատրաստակամ է համաշխարհային ֆինանսատնտեսական ճգնաժամի պայմաններում հնարավորինս աջակցել դրանց։
Զրույցի ընթացքում, մասնավորապես, քննարկվել են տրանսպորտի, էներգետիկայի բնագավառների, ինչպես նաև պետական պարտքի դիմաց ՌԴ-ին փոխանցված ձեռնարկությունների գործունեությանն առնչվող հարցեր։
Կարևորելով ՀՀ-ի և ՌԴ-ի միջև տրանսպորտային բեռնափոխադրումների պատշաճ ապահովման խնդիրը, կողմերը քննարկել են Կովկաս-Փոթի-Կովկաս երկաթուղային-լաստանավային և Նովոռոսիյսկ-Փոթի-Նովոռոսիյսկ ավտոմոբիլային - լաստանավային երթուղիների հետ կապված հարցերը։
Տ. Սարգսյանը և Ս. Իվանովը խոսել են նաև ՌԴ կոնցեսիոն կառավարմանը փոխանցված Հայաստանի երկաթուղային ցանցի, կոնցեսիոն պայմանագրի կատարման մասին, անդրադարձել սակագնային քաղաքականությանը, երկաթգծի տեխնիկական վերազինման, արդիականացման համար պահանջվող ներդրումներին։
Հայ-ռուսական տնտեսական հարաբերությունների զարգացման գործում վարչապետ Տիգրան Սարգսյանը կարևորել է «Գույք պարտքի դիմաց» համաձայնագրով Ռուսաստանին փոխանցված արդյունաբերական և գիտական ձեռնարկությունների տարածքում տնտեսական գոտիների ստեղծման գործընթացն արագացնելու խնդիրը։ Սերգեյ Իվանովն իր հերթին նշել է, որ այն ռուսական կողմի ուշադրության կենտրոնում է և առաջիկայում լուծում կստանա։
Կողմերը խոսել են 2014թ. ՌԴ Սոչի քաղաքում կայանալիք Օլիմպիական խաղերի նախապատրաստման շրջանակում նախատեսվող շինարարական աշխատանքներին ՀՀ մասնակցության, մասնավորապես` շինանյութերի մատակարարման մասին։
ՀՀ կառավարության ղեկավարը և ՌԴ կառավարության նախագահի տեղակալը երկուստեք կարևորել են Տնտեսական համագործակցության հարցերի հայ-ռուսական միջկառավարական հանձնաժողովի դերը, նշելով, որ այն հնարավորություն է տալիս բացահայտելու փոխգործակցության ներուժը և նրա մեջ ընդգրկելու նոր ոլորտներ։
