ուրբաթ, 28 մարտի 2003
Մարտի 28-ին տեղի ունեցավ ՀՀ կառավարության բարեգործական ծրագրերի համակարգման հանձնաժողովի 2003 թվականի հերթական՝ երկրորդ նիստը, որը վարում էր հանձնաժողովի նախագահ Վ. Մովսիսյանը:
Հանձնաժողովը քննարկեց 2003-2005 թվականների ընթացքում իրականացվող երկարաժամկետ և կարճաժամկետ 4 բարեգործական ծրագրեր: Մասնավորապես, նիստում քննարկվեց և հաստատվեց «Բարեշավիղ միաբանություն» բարեգործական հասարակական կազմակերպության կողմից իրականացվող «Օգնություն մանկատներին և կարիքավորներին» ծրագիրը, որը նպատակ ունի 2003-2004 թվականների ընթացքում օգնել Հայաստանի մանկատներին, գիշերօթիկ հաստատություններին, դրանց հետ առնչվող կարիքավոր ընտանիքներին, ինչպես նաև հովանավորել Երևանի «Զատիկ» մանկատան և հատուկ կրթահամալիրներ ավարտած սաներին՝ նպաստելով նրանց հասարակության մեջ ինտեգրմանը։
Քննարկվեց և հաստատվեց «Քաղցկեղով երեխաներին օգնության ընկերություն» հասարակական կազմակերպության կողմից իրականացվող «Փրկենք երեխաներին քաղցկեղից» ծրագիրը, որը նպատակ ունի Հայաստանի Հանրապետության քաղցկեղով հիվանդներին և հատկապես երեխաներին ապահովել հակաքաղցկեղային դեղորայքով, բժշկական պարագաներով և սարքավորումներով։
Քննարկվեց և հաստատվեց նաև «ԱՌԴԱ» բարեգործական հիմնադրամի կողմից մինչև 2005 թվականն ընկած ժամանակահատվածում իրականացվող «Բարեկեցիկ մանկություն-3» ծրագիրը, որը Նոր-Նորքի համայնքի թիվ 3 մանկապարտեզի սաների կենցաղային, կրթական և առողջապահական պայմանների բարելավման նպատակ ունի։
Նիստում քննարկվեց և հաստատվեց «Ինտերկապ» բարեգործական կենտրոն» հասարակական կազմակերպության կողմից իրականացվող ծրագիրը, որով նախատեսված է 2003-2005 թվականների ընթացքում Գերմանիայի Ֆլոտո քաղաքի Կարմիր խաչի և Ֆրանսիայի Վալանս քաղաքի «Ինտերկապ Ֆրանս-Արմենի» բարեգործական միության միջոցներով բարեգործական բեռների ներմուծում և անհատույց բաշխում կարիքավորներին և դոնորների կողմից ընտրված շահառուներին։
Քննարկվեցին նաև 8 բարեգործական ու հասարակական կազմակերպությունների հասցեներով ուղարկված բարեգործական բեռների ներմուծման ու բաշխման հարցեր, ինչպես նաև բարեգործական ծրագրերին հարակից 18 գործարքներ, որոնցով բարեգործական կազմակերպություններին տրվեցին հարկային արտոնություններ՝ համապատասխան ծրագրերի շրջանակներում։
