ուրբաթ, 29 մայիսի 2009
ՀՀ վարչապետ Տիգրան Սարգսյանի շնորհավորական ուղերձը «Բերդ» պարային անսամբլի հիմնադրման 45-ամյակի առթիվ
Աշխարհի քաղաքակիրթ բոլոր ազգերն էլ համայն մարդկության համատեղ գոյակերպի մեջ իրար են ներկայանում նախևառաջ իրենց մշակույթով։ Պարարվեստը մեր ժողովրդի ինքնադրսևորման ամենավառ միջոցներից է, որով նա ապրել է դարեր շարունակ։
«Բերդ» պարային անսամբլը որպես մշակութային կոլեկտիվ անցել է զարգացման ազգային ակունքներից բխող յուրահատուկ ճանապարհ։ Քառասունհինգ տարիների տարեգրության ընթացքում բազմաթիվ սերունդներ են անցել պարախմբի ամրակուռ դարպասներով, սնվել հայ պարի անաղարտ ոգու շտեմարանից և տարել իրենց հետ հայկական պարերի չխամրող հմայքը։
Որտեղ էլ հանդես է եկել «Բերդ» պարային անսամբլը` Հայաստանում, թե Հայաստանից դուրս` միջազգային բեմերում, փառքով և պատվով է ներկայացրել Հայ Պարը, իր արվեստով հմայել ու գերել է հարյուր հազարավոր հանդիսատեսների, և պարարվեստի միջոցով օտարազգի հանդիսատեսին ճանաչելի ու սիրելի է դարձրել նաև հայ մարդուն ու Հայաստանը։
Սրտանց շնորհավորելով «Բերդ» պարային անսամբլին հիմնադրման 45-ամյա հոբելյանի առթիվ` մաղթում եմ ստեղծագործական նորանոր հաջողություններ և հաղթանակներ ի նպաստ հայ մշակույթի և հայկական ժողովրդական պարարվեստի։
