երկուշաբթի, 28 ապրիլի 2003
Այսօր ՀՀ վարչապետ Անդրանիկ Մարգարյանն ընդունել է Ինտերպոլի գլխավոր քարտուղար Ռոնալդ Քեննեթ Նոբլին: Ողջունելով միջազգային այդ ազդեցիկ կազմակերպության ղեկավարի առաջին այցը մեր երկիր՝ վարչապետը նշել է, որ դա, ըստ էության, Հայաստանի ոստիկանության, բոլոր իրավապահ մարմինների աշխատանքի արդյունավետության գնահատման ու համագործակցության վկայությունն է: Անդրանիկ Մարգարյանն ընդգծել է, որ Հայաստանի ոստիկանությունը ահաբեկչության, թմրաբիզնեսի դեմ պայքարում, բնակչության ապօրինի միգրացիայի հետևանքով ծագող խնդիրների լուծման և այլ ոլորտներում ակտիվորեն գործակցում է ինչպես ԱՊՀ, այնպես էլ Սևծովյան տնտեսական համագործակցության երկրների ներքին գործերի մարմինների, ինչպես նաև միջազգային այլ կառույցների հետ: Ու թեև, ըստ նրա, Հայաստանում քրեական հանցագործությունների պատկերը վտանգավոր չափեր չունի, սակայն կառավարությունն ամեն ջանք գործադրում է դրանց տարածումը կանխարգելելու համար: Միջազգային հանցավորության դեմ պայքարի գործում կարևորելով Ինտերպոլի համակարգող դերը, վարչապետը հույս է հայտնել, որ գլխավոր քարտուղարի այցը կնպաստի այդ կազմակերպության հետ մեր երկրի համագործակցության հետագա խորացմանը:
Ինտերպոլի գլխավոր քարտուղար պարոն Քեննեթ Նոբլը իր հերթին բարձր գնահատական է տվել Հայաստանի իրավապահ մարմինների, ոստիկանության, նրա առանձին կառույցների աշխատանքին: Նա տեղեկացրել է, որ դա հնարավորություն է ընձեռել Նորվեգիայի կառավարության կողմից Հայաստանին 100 հազար ԱՄՆ դոլարի չափով դրամաշնորհ տրամադրելու համաձայնության ձեռքբերմանը, որն ամբողջովին ուղղվելու է Հայաստանի ոստիկանության տեխնիկական վերազինմանը: Նոր համակարգի ներդրման դեպքում, ըստ պարոն Նոբլի, Ինտերպոլի 151 անդամների մեջ Հայաստանը կդառնա ժամանակակից բարձրորակ սարքավորումներով հագեցած համակարգ ունեցող 50-րդ երկիրը, ինչը մեծապես կնպաստի ոստիկանության կառույցների կատարելագործմանը, երկրի ներքին անվտանգության ապահովմանը: Գլխավոր քարտուղարը հավաստել է նաև, որ համատեղ ծրագրերի ֆինանսավորումը Ինտերպոլի կողմից կշարունակվի նաև հետագայում:
