երկուշաբթի, 28 սեպտեմբերի 2009
Հայաստանի Հանրապետության վարչապետ Տիգրան Սարգսյանն այսօր ընդունել է գերմանական KfW բանկի առաջին փոխնախագահ Ռոլանդ Զիլլերին։
ՀՀ վարչապետը շնորհակալություն է հայտնել Գերմանիայի Դաշնության Հանրապետության կառավարությանը և KfW բանկին Հայաստանին ցուցաբերած աջակցության համար։ Ըստ նրա, KfW բանկի հետ փոխգործակցության անցած տարիները ցույց են տվել, որ հնարավոր է շատ լավ արդյունքների հասնել։
Զրույցի ընթացքում կարևորվել են Հայաստանում բանկի կողմից իրականացվող ֆինանսական, հատկապես հիպոթեքային շուկայի, համայնքային զարգացման և էներգետիկայի ոլորտներում իրականացվող ծրագրերը։ Նշվել է, որ աղետի գոտու սոցիալական հիմնախնդիրների լուծման հարցերը, որոնք հուզում են բանկին, գտնվում են նաև ՀՀ կառավարության ուշադրության կենտրոնում։
Հանդիպման ավարտին, կարևորելով ծրագրերի շարունակականության ապահովումը, ՀՀ վարչապետը հաջողություն է մաղթել KfW բանկի՝ մեր երկրում հետագա գործունեությանը և հավաստել փոխշահավետ համագործակցությանը հնարավորինս աջակցելու ՀՀ կառավարության պատրաստակամությունը։
