շաբաթ, 3 հոկտեմբերի 2009
Հայաստանի Հանրապետության վարչապետ Տիգրան Սարգսյանն այսօր Ուսուցչի տոնի կապակցությամբ պարգևներ է հանձնել հանրապետության լավագույն ուսուցիչներին։ ՀՀ վարչապետի հուշամեդալով և շնորհակալագրերով պարգևատրվել են հանրապետության մի շարք ուսուցիչներ։ «Տարվա լավագույն ուսուցիչ» և «Տարվա լավագույն դաստիարակ» մրցույթների հաղթողներին ՀՀ վարչապետը հանձնել է ավտոմեքենայի բանալիներ։
ՀՀ կառավարության ղեկավարն իր ելույթում կարևորել է ուսուցչի առաքելությունը մեր կյանքում և նշել է, որ վերջին տարիների ընթացքում պետությունը լուրջ աշխատանքներ է իրականացնում Հայաստանում ուսուցչի դերն ըստ արժանվույն գնահատելու համար։ Դիմելով ներկաներին` կառավարության ղեկավարը մասնավորապես ասել է. «Ուսուցիչների աշխատանքով է պայմանավորված լինելու մեր երկրի ապագան։ Հատկապես 21-րդ դարում գիտելիքը ոչ միայն տնտեսության, այլ հասարակության կազմակերպման հիմքն է։ Ուսուցիչներն ամեն օր պետք է սովորեն, որովհետև աշխարհը շատ արագ է փոխվում, գիտելիքները շատ արագ հնանում են, մաշվում։ Մենք ուզում ենք ունենալ ժամանակակից ուսուցիչ, իսկ դա նշանակում է, որ պետությունը պետք է ստեղծի բոլոր հնարավոր պայմանները ուսուցիչների վերապատրաստումն ապահովելու համար»։ Ամփոփելով խոսքը Տիգրան Սարգսյանը նշել է, որ կարևոր է համարում դպրոցաշինությունն ու ոլորտում առկա խնդիրների լուծումը։
