Հայաստանի Հանրապետության Կառավարություն

Հայաստան Հանրապետության վարչապետ Տիգրան Սարգսյանն այսօր ընդունել է Ֆրանսիայի Պրովանս-Ալպ-Կոտ դ՛ Ազյուրի (ՊԱԿԱ) շրջանային խորհրդի նախագահ, Ֆրանսիայի ազգային ժողովի պատգամավոր Միշել Վոզելին և նրա գլխավորած պատվիրակությանը։
Ողջունելով հյուրերին և գոհունակություն հայտնելով հայ- ֆրանսիական հարաբերություների դինամիկ զարգացման վերաբերյալ, գործադիրի ղեկավարը խոսել է Հայաստանի Հանրապետության կառավարության ծրագրերի, ու այդ համատեքստում երկկողմ նախագծերի իրականացման հնարավորությունների մասին։
Զրուցակիցները անդրադարձել են ՀՀ Լոռու և Ֆրանսիայի Պրովանս-Ալպ-Կոտ դ՛ Ազյուրի մարզերի միջև համագործակցության զարգացմանը և այդ համատեքստում կարևորել են կրթության և գիտության, առողջապահության, տեղեկատվական տեխնոլոգիաների, մասնավորապես` միկրոէլեկտրոնիկայի և հեռահաղորդակցության ոլորտներում համագործակցության խորացման հեռանկարները։
Հանդիպման ընթացքում ՀՀ վարչապետ Տիգրան Սարգսյանը վստահեցրել է, որ կառավարությունը կաջակցի Լոռու մարզում ծրագրերի իրականացմանը և հույս հայտնել, որ իրականացվող նախագծերը համահունչ կլինեն կառավարության երկարաժամկետ ծրագրերին և գերակա ուղղություններին, որոնց նպատակը Հայաստանի Հանրապետության տարածքների համաչափ զարգացումն է։