Հայաստանի Հանրապետության Կառավարություն

Հայաստանի Հանրապետության վարչապետ Տիգրան Սարգսյանն այսօր ընդունել է ԱՊՀ անդամ պետությունների Աֆղանական պատերազմի վետերանների հարցերով համակարգող խորհրդի նախագահ Ռուսլան Աուշեվին և նրա գլխավորած պատվիրակությանը։
Ողջունելով հյուրերին, ՀՀ վարչապետը նշել է, որ Հայաստանի հազարավոր զավակներ մասնակցել են աֆղանական պատերազմին և որ Հայաստանում գործում է աֆղանական պատերազմի վետերանների միությունը։
Համակարգող խորհրդի անդամները գործադիրի ղեկավարին ներկայացրել են իրենց ծրագրերն ու նախաձեռնությունները և գոհունակություն հայտնել ԱՊՀ շրջանակներում Հայաստանի Հանրապետության կառավարության կողմից ցուցաբերվող հետևողական աջակցության ու համագործակցության պատրաստակամության համար։
ՀՀ վարչապետը` Հայաստանի Հանրապետության Նախագահի և իր անունից հայտնել է, որ մեր երկիրն աջակցում է աֆղանական պատերազմի վետերանների միության հանրային նախաձեռնություններին։ ՀՀ կառավարության ղեկավարը կարևորել է հայրենիքի զինվորի և վետերանների նկատմամբ պետության հոգածությունը։