ուրբաթ, 16 հոկտեմբերի 2009
Այսօր Հայաստանի Հանրապետության վարչապետ Տիգրան Սարգսյանն ընդունել է Ուկրաինայի արդյունաբերական քաղաքականության նախարար, Հայ-ուկրաինական առևտրատնտեսական համագործակցության միջկառավարական հանձնաժողովի համանախագահ Վլադիմիր Նովիցկուն։
Ողջունելով հյուրին` Տիգրան Սարգսյանը նշել է, որ հայ-ուկրաինական տնտեսական հարաբերություններում կան զարգացման հնարավորություններ ու չօգտագործված մեծ ներուժ։
Վարչապետն ընդգծել է, որ անհրաժեշտ է ակտիվացնել միջկառավարական հանձնաժողովի աշխատանքները, ինչը կարող է նոր լիցք հաղորդել երկկողմ տնտեսական հարաբերությունների զարգացմանը։ Այդ համատեքստում ՀՀ կառավարության ղեկավարը ողջունելի է համարել նաև Խարկովի նահանգապետի գլխավորած պատվիրակության նախօրեին կատարած այցը Հայաստան` կարևորելով համագործակցության խորացումը երկու երկրների մարզերի միջև։
Չնայած համաշխարհային տնտեսական ճգնաժամը հանգեցրել է 2009թ. առաջին կիսամյակում երկու երկրների միջև ապրանքաշրջանառության ծավալի նվազմանը, զրուցակիցները համոզմունք են հայտնել, որ ապրանքաշրջանառության ներկայիս մակարդակը չի համապատասխանում երկրների իրական տնտեսական ներուժին, և անհրաժեշտ է միջոցներ ձեռնարկել այն ընդլայնելու համար, որում մեծ դեր կարող է ունենալ նաև Հայ-ուկրաինական առևտրատնտեսական համագործակցության միջկառավարական հանձնաժողովը։
Փոխադարձաբար անհրաժեշտ է համարվել համագործակցության ընդլայնումը մեքենաշինության, ավիացիայի, գյուղատնտեսության, տեղեկատվական տեխնոլոգիաների, գիտության և կրթության, տրանսպորտի, մշակույթի և առողջապահության ոլորտներում։
ՀՀ կառավարության ղեկավարը հույս է հայտնել, որ միջկառավարական հանձնաժողովի աշխատանքների ակտիվացումը կխթանի տնտեսական հարաբերությունների զարգացումը և նշել է, որ կան փոխշահավետ համագործակցության լայն հնարավորություններ։
