Հայաստանի Հանրապետության Կառավարություն

Այսօր ՀՀ վարչապետ Տիգրան Սարգսյանն ընդունել է Բելառուսի հանրապետության արտաքին գործերի նախարար Սերգեյ Մարտինովին։
Զրուցակիցները նշել են, որ չնայած համաշխարհային ֆինանսատնտեսական ճգնաժամին, երկու պետությունների տնտեսական հարաբերություններում կան դրական միտումներ և դրանք անհրաժեշտ է զարգացնել` միջկառավարական հանձնաժողովի աշխատանքների ակտիվացման միջոցով։
Անդրադարձ է կատարվել երկկողմ հետաքրքրություն ներկայացնող մի շարք ոլորտներում հնարավոր համագործակցությանը` մասնավորապես տրակտորաշինության, հանքարդյունաբերական ու տրանսպորտային մեքենաշինության ու բարձր տեխնոլոգիաների բնագավառներում։ Կարևորվել է հայ-բելառուսական գործարար կենտրոնի ստեղծման գաղափարը, ինչը կարող է դառնալ գործարար կապերի զարգացման հստակ պլատֆորմ։
Կառավարության ղեկավարն ասել է, որ քննարկված բոլոր հարցերին հարկ է անդրադառնալ միջկառավարական հանձնաժողովի մյուս նիստում, որը կունենա առավել հստակ օրակարգ, ինչը հնարավորություն կտա ավելի մեծ արդյունքների հասնել։
Սերգեյ Մարտինովը Տիգրան Սարգսյանին է փոխանցել Բելառուսի Հանրապետություն այցելելու հրավերը։