երեքշաբթի, 3 հունիսի 2003
Այսօր ՀՀ վարչապետ, ՀՀԿ խորհրդի նախագահ Անդրանիկ Մարգարյանն ընդունել է ԵԱՀԿ-ի, ժողովրդավարական հաստատաությունների ու մարդու իրավունքների գրասենյակի (ԺՀՄԻԳ) կողմից կազմավորված դիտորդական առաքելության խմբի ղեկավար, դեսպան Ռոբերտ Բարրին, որն ավարտում է իր առաքելությունը մեր երկրում: Հանդիպմանը ներկա է եղել նաև ՀՀ ԱԺ փոխխոսնակ, ՀՀԿ փոխնախագահ Տիգրան Թորոսյանը:
Դեսպան Բարրին նրանց շնորհավորել է ընտրություններում Հայաստանի Հանրապետական կուսակցության ունեցած հաջողության համար և նշել, որ վաղը իր գլխավորած առաքելությունը կհրապարակի 4-րդ միջանկյալ հաշվետվությունը, որտեղ խորհրդարանական ընտրությունների վերաբերյալ առաքելության ընդհանուր գնահատականը կպահպանվի: Ըստ դրա, անցած ընտրությունները առաջընթաց են արձանագրել նախագահական ընտրությունների համեմատ: Տեղեկացնելով, որ ԵԱՀԿ ներկայացուցիչները դեռևս կմնան Հայաստանում՝ հետևելու 3 ընտրատարածքներում տեղի ունենալիք վերընտրությունների ընթացքին, պրն Բարրին կարևորել է ՀՀ իշխանությունների վճռականությունը՝ մեղավորներին պատասխանատվության ենթարկելու հարցում, ինչը կվերականգնի վստահությունը ընտրական գործընթացների նկատմամբ:
Դիտորդական առաքելության ղեկավարը նշել է նաև, որ ԱԺ ընտրություններում ՀՀ նախագահը և կառավարությունը կարևոր քայլեր են ձեռնարկել, որոնք, նրա բնորոշմամբ, ուղղված են եղել ճիշտ մթնոլորտի ձևավորմանը:
Ռոբերտ Բարրին, ինչպես հայաստանյան մյուս քաղաքական ուժերից, այնպես էլ Հանրապետական կուսակցության ղեկավարից հետաքրքրվել է ընտրությունների վերաբերյալ ՀՀԿ-ի գնահատականների ու ընտրական գործընթացների կատարելագործմանն ուղղված առաջարկների մասին:
Անդրանիկ Մարգարյանը, շնորհակալություն հայտնելով ԵԱՀԿ/ԺՀՄԻԳ դիտորդական առաքելությանն ու նրա ղեկավարին՝ ընտրություններին իրենց ներկայության ու առաջարկների համար, նշել է, որ ՀՀԿ-ն հիմնականում համաձայն է դիտորդական առաքելության զեկույցի գնահատականների հետ և գտնում է, որ նկատված խախտումներն ու թերությունները էական ազդեցություն չեն ունեցել ընտրությունների արդյունքի վրա: Իսկ ընտրական գործընթացի վրա ստվեր գցած առանձին դեպքերի վերաբերյալ, Հանրապետական կուսակցությունը, ըստ նրա ղեկավարի, իր բացասական վերաբերմունքն ու դիրքորոշումն արդեն արտահայտել է: Անդրանիկ Մարգարյանը միաժամանակ նշել է, որ ընտրությունների հետ կապված ՀՀԿ-ն իր մոտեցումներն առաջիկայում կամփոփի, որոնց արդյունքում առաջարկներ կներկայացնի Ընտրական օրենսգրքում և «Կուսակցությունների մասին» ՀՀ օրենքում որոշակի փոփոխություններ կատարելու համար:
Հանրապետական կուսակցությունը, ըստ Անդրանիկ Մարգարյանի, կողմ է համամասնական, մեծամասնական ընտրակարգերի հարաբերակցության վերանայմանը՝ հօգուտ առաջինի, քանի որ այդպիսով քաղաքական ուժերի լիարժեք դրսևորման, նրանց ակտիվ գործունեության համար դա նպաստավոր կլինի: Կուսակցության ղեկավարը ընդգծել է, որ ՀՀԿ-ն պատրաստ է ընտրական օրենսդրությունը կատարելագործելու նպատակով համագործակցել ինչպես հայաստանյան քաղաքական ուժերի, այնպես էլ շահագրգիռ միջազգային կազմակերպությունների հետ: Հանրապետականը մշտապես հանդես է եկել հանդուրժողականության դիրքերից և Անդրանիկ Մարգարյանի հավաստմամբ, այժմ էլ նույնպիսի մոտեցում ունի, քանի որ շարունակելու է խորհրդարանում և դրանից դուրս համագործակցել քաղաքական ուժերի հետ:
