չորեքշաբթի, 10 փետրվարի 2010
Նոր ծրագիրը կնպաստի հայ-իրանական մշակութային համագործակցության զարգացմանը
Վարչապետ Տիգրան Սարգսյանն այսօր ընդունել է ԻԻՀ Նախագահի խորհրդական, ԻԻՀ մշակույթի և իսլամական կապերի կազմակերպության նախագահ Մեհդի Մոստաֆավիին։
Ողջունելով հյուրին` Տիգրան Սարգսյանը բարձր է գնահատել ՀՀ և ԻԻՀ միջև մշակութային կապերի ամրապնդումը, նշելով, որ ժամանակակից աշխարհի խնդիրներից շատերի լուծման բանալին գտնվում է հոգևոր, մշակութային ոլորտում։ Կառավարության ղեկավարը կարևորել է բարձրաստիճան պատվիրակությունների փոխադարձ պաշտոնական այցերը, այդ թվում նշելով նաև վերջերս Երևանում տեղի ունեցած հայ-իրանական միջկա¬ռավարական հանձնաժողովի 9-րդ նիստը` ԻԻՀ ԱԳ նախարար Մանուչեհր Մոթթաքիի համանախագահությամբ։ Զրուցակիցներն անդրադարձել են նաև այս օրերին Թեհրանում կազմակերպվող ARMEX 2010 տնտեսական ֆորումին` Հայաստանի և Իրանի գործարարների մասնակցությամբ։
Անդրադառնալով հայ-իրանական մշակութային հարաբերությունների ներկայիս մակարդակին` զրուցակիցները համոզմունք են հայտնել, որ «ՀՀ մշակույթի նախարարության և ԻԻՀ մշակույթի և իսլամական կապերի կազմակերպության միջև 2010-2012 թթ. մշակութային համագործակցության մասին» գործնական ծրագրի ստորագրումը նոր խթան կհանդիսանա փոխհամագործակցության հետագա զարգացման համար։
Տիգրան Սարգսյանը գոհունակությամբ է խոսել Իրանի տարածքում հայկական պատմական և հոգևոր կենտրոնների պահպանման հարցում ԻԻՀ պատկան մարմինների գործունեության մասին։ Վարչապետը բարձր է գնահատել նաև Իրանի վերաբերմունքը հայ ժողովրդի նկատմամբ և օգտվելով առիթից` շնորհավորել է իրանական պատվիրակությանը Իսլամական հեղափոխության հաղթանակի 31-րդ տարեդարձի կապակցությամբ։
