Հայաստանի Հանրապետության Կառավարություն

Վարչապետ Տիգրան Սարգսյանն այսօր ընդունել է կորեական ընկերությունների և գործարարների պատվիրակությանը կորեական «KORES» ընկերության նախագահ և գլխավոր գործադիր տնօրեն Քիմ Շին Ջոնգի ղեկավարությամբ։ Պատվիրակության կազմում էին Korea Resources Corporation (KORES), Daewoo Shipbuilding & Marine Engineering (DSME), DSME E&R և CORUS ընկերությունների բարձրաստիճան ներկայացուցիչներ։ Հանդիպմանը մասնակցել են նաև հայաստանյան «Վալլեքս» խմբի ներկայացուցիչներ։
Ողջունելով հյուրերին` վարչապետը հույս է հայտնել, որ հայ և կորեացի գործարարների համագործակցությունը հաջող ընթացք կունենա, քանզի առկա են երկկողմ հետաքրքրություն ներկայացնող մի շարք նախագծեր։
Կորեական ընկերությունների ներկայացուցիչները նշել են, որ շահագրգռված են Հայաստանում տարբեր ոլորտներում ներդրումային ծրագրերի իրականացմամբ, մասնավորապես օգտակար հանածոների հետախուզման և արդյունահանման, խտանյութերի վերամշակման ու ենթակառուցվածքների զարգացման ուղղությամբ։
Զրուցակիցները կարևորել են համագործակցության վերաբերյալ հուշագրերի ստորագրումը հայկական պետական գերատեսչությունների և ընկերությունների ու կորեական կազմակերպությունների միջև։