ուրբաթ, 9 ապրիլի 2010
Այսօր տեղի է ունեցել Հայաստանի Հանրապետության կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Սիմոն Տեր Սիմոնյանը։
Հանձնաժողովը քննարկել է բարեգործական 12 ծրագիր։
Մասնավորապես, քննարկվել և հաստատվել են`
«Հայաստան» համահայկական հիմնադրամի կողմից իրականացվող` Հայաստանի Հանրապետության Լոռու մարզի Արծնի գյուղի համայնքային կոնտրոնի հիմնանորոգում ծրագիրը։
Հայկական բարեգործական ընդհանուր միության Հայաստանի ներկայացուցչության կողմից իրականացվող «Սկաուտական ճամբարի գործունեություն» ծրագիրը, որի նպատակն է ընդլայնել Հայաստանի Հանրապետության Լոռու մարզի Լերմոնտովո գյուղին հարող տարածքում ստեղծված ճամբարը և կազմակերպել 2010 թվականին ամառային ճամբարի գործունեությունը։
Մայր Աթոռ Սուրբ Էջմիածնի կողմից իրականացվող «Աշխատավորական սեղանատան» ջեռուցման և ջրամատակարարման համակարգի վերակառուցման, միաբանական նոր ճաշարանի շինարարության և դիվանատան շրջակայքի բարեկարգման աշխատանքների իրականացման ծրագրերը։
«Օրրան» բարեգործական հասարակական կազմակերպության կողմից իրականացվող «Օրրան-Վանաձոր» օգնություն կարիքավոր ընտանիքներին» ծրագիրը։
Ֆրանսիայի «Բժիշկներ առանց սահմանների» միության հայաստանյան մասնաճյուղի կողմից իրականացվող «Տուբերկուլյոզի և դեղորայքակայուն տուբերկուլյոզի վերահսկման ինտեգրացված ծրագրի ընդլայնումը Հայաստանի Հանրապետությունում» ծրագիրը։
«Հայաստանի Հանրապետությունում ՄԻԱՎ/ՁԻԱՀ-ի դեմ պայքարի ազգային ծրագրի աջակցություն» ծրագիրը։
«Հայկական ակնաբուժության նախագիծ» բարեգործական հիմնադրամի կողմից իրականացվող ծրագիրը։
«Ջինիշյան» հիշատակի հիմնադրամի կողմից իրականացվող «Գյուղատնտեսական կոոպերատիվների կայուն զարգացոմ», «Ամառային ճամբար խոցելի ընտանիքների երեխաների համար և հոգևոր վերելք Հայաստանի Հանրապետության հեռավոր գյուղերում» և Լեռնային Ղարաբաղի Հանրապետության առողջապահական ծառայությունների որակի բարելավում» ծրագրերը։
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ստացված բարեգործական բեռների ներմուծման ծրագրեր։
