Հայաստանի Հանրապետության Կառավարություն

Այսօր տեղի է ունեցել Հայաստանի Հանրապետության կառավարության աշխատակազմի ղեկավար Դավիթ Սարգսյանի մամուլի ասուլիսը` նվիրված կառավարության թարմացված www.gov.am և նոր www.e-gov.am կայքերի ներկայացմանը։ Դավիթ Սարգսյանը նշել է, որ երկու նպատակ է եղել www.gov.am կայքի վերափոխման համար. առաջինը` ստանալ դինամիկ կայք և հաջորդը` առավելագույն թափանցիկություն։ Մյուս թարմացումները, որ տեղի են ունեցել կայքում, դիզայնի փոփոխությունն է` նախկին հիմնական կարմիր գույնի փոխարեն կայքը ձևավորված է ծիրանագույն գույնով, որը խորհրդանշում է հանրապետության դրոշի գույներից մեկը։ Նոր կայքի առավելությունն այն է, որ գլխավոր էջում տեղադրված են փոփոխվող նկարներ, որոնք համապատասխանում են գլխավոր նորություններին։ Կայքում նորամուծություն է նաև տեսանյութեր բաժինը, որտեղ ոչ բոլոր մամլո հաղորդագորություններին կից տեղադրված են տեսանյութեր։
Կառավարության աշխատակազմի ղեկավարը ընդգծել է, որ արդեն կայքը հնարավորություն ունի ցուցադրել «Հրապարակում» հաղորդաշարը, որը մինչ այդ տեղադրվում էր www.youtube.com-ում որոշակի կրճատումներոով։ Այսուհետ  կայքը հնարավորություն կընձեռի բաժանորդագրված այցելուներին ստանալ նաև մյուս բաժինների թարմացումները։
Տեղեկատվական կենտրոն բաժնում տեղակայված է «Մամուլը մեր մասին» ենթաբաժինը, որտեղ հնարավոր է գտնել, թե ինչ է գրում օրվա մամուլը կառավարության մասին։
Դավիթ Սարգսյանը ներկայացրել է նաև www.e-gov.am կայքը, որտեղ փորձ է արվել  ներկայացնել կառավարության էլեկտրոնային ծառությունները։ www.e-gov.am կայքում տեղադրված է «Ինտերակտիվ բյուջե» ենթաբաժինը, որտեղ ներկայացված են բյուջեի ծախսերը։
«Սա առաջին քայլն է. մենք չենք հավակնում ասել, որ կայքն ամբողջական է և բոլոր հարցերի պատասխանները կտա, այդ իսկ պատճառով աշխատանքներ են տարվում` գոյություն ունեցող էլեկտրոնային ծառայությունները մեկտեղելու ուղղությամբ»,- հայտնել է Դավիթ Սարգսյանն ու հավելել, որ առաջիկա ամիսներին ևս կայքը նոր լրացումներով կթարմացվի։