չորեքշաբթի, 29 սեպտեմբերի 2010
Կառավարության համագործակցությունը «Ֆերմերների ազգային միավորման» հետ նպաստում է գյուղատնտեսական քաղաքականության արդյունավետության բարձրացմանը
Վարչապետ Տիգրան Սարգսյանն այսօր ընդունել է «Ֆերմերների ազգային միավորման» (ՖԱՄ) խորհրդի անդամներին խորհրդի նորընտիր նախագահ Ռոզա Ծառուկյանի գլխավորությամբ։
Շնորհավորելով խորհրդի նորակազմ ղեկավարությանը և կարևորելով խորհրդի վաղաժամ կյանքից հեռացած նախագահի գործի շարունակականության ապահովումը` վարչապետը մասնավորապես, նշել է. «Մեր համագործակցությունը «Ֆերմերների ազգային միավորման» հետ արդեն ավանդական է դարձել։ Դրա իմաստն այն է, որ ի դեմս «Ֆերմերների ազգային միավորման»` կառավարությունն ունենա գործընկեր, որի միջոցով մենք կկարողանանք ավելի արդյունավետ իրականացնել գյուղատնտեսական քաղաքականությունը։ Հասկանալի է, որ մեզ անհրաժեշտ է ուղղակի կապ ֆերմերների հետ, որպեսզի ստանանք ազդակներ` ինչպիսին է իրական իրավիճակը գյուղում, որոնք են այն առաջնահերթ խնդիրները, որոնք մտահոգում են գյուղացիներին այսօր։ Բնականաբար, պետք է կարողանանք մեր ծրագրերը ձեզ համար դարձնել ընդունելի, հասկանալի և մատչելի։ Այդ երկխոսության շնորհիվ ավելի հեշտ կլինի մեր ծրագրի արդյունավետության բարձրացումը»։
Ռոզա Ծառուկյանը շնորհակալություն է հայտնել վարչապետին հանդիպման համար և ներկայացրել խորհրդի` 2010 թ. օգոստոսի 31-ին կայացած նախագահության նիստում հաստատված յոթ հանձնաժողովների կազմը, որոնք զբաղվելու են ագրարային քաղաքականության և օրենսդրության, ագրարային կրթություն-գիտություն-արտադրություն կապերի ապահովման, անասնապահության տոհմային գործի կազմակերպման, գյուղատնտեսական մշակաբույսերի, սերմնաբուծության և սելեկցիայի, բնապահպանության և շրջակա միջավայրի պահպանության, գյուղատնտեսության մեքենայացման և նոր տեխնոլոգիաների ներդրման ու պետության և այլ տնտեսվարող սուբյեկտների միջև համագործակցության ապահովման հարցերով։ Վերոնշյալ հանձնաժողովների համակարգողներն արծարծել են ոլորտի զարգացմանն առնչվող մի շարք հարցեր և ներկայացրել դրանց լուծման վերաբերյալ իրենց առաջարկությունները։
Ամփոփելով քննարկման արդյունքները` Տիգրան Սարգսյանը ՖԱՄ-ի խորհրդի անդամների ուշադրությունը հրավիրել է ՀՀ գյուղատնտեսության 2010-2020 թթ. կայուն զարգացման ռազմավարության ծրագրի վրա` ընդգծելով այն նրանց առաջարկություններով լրացնելու կառավարության պատրաստակամությունը։ Նա նաև կարևորել է խորհրդի հանձնաժողովների աշխատանքային ծրագրերի մշակումն ու ներկայացումը` նպատակաուղղված գյուղատնտեսության նախարարության հետ համատեղ աշխատանքների ավելի արդյունավետ կազմակերպմանը։
