ուրբաթ, 5 սեպտեմբերի 2003
Այսօր ՀՀ կառավարությունում, Տարածքային կառավարման և ենթակառուցվածքների գործունեությունը համակարգող նախարար Հովիկ Աբրահամյանը հրավիրել է «Հիդրոտեխնիկական կառուցվածքներ Որոտան գետի վրա» օբյեկտը շահագործման ընդունող կառավարական հանձնաժողովի նիստ:
Լսվել են հանձնաժողովին կից աշխատանքային հանձնախմբի հաշվետվությունը աշխատանքների ընթացքի մասին, կապալառու կազմակերպությունների՝ «Արփա - Սևան» ԲԲԸ- ի և «Հիդրոմասնագետշին» ՓԲԸ- ի տեղեկատվությունը շինարարական մնացորդային աշխատանքների և «Հայէներգոնախագիծ» ՓԲԸ - ի տեղեկատվությունը՝ անհրաժեշտ նախագծա - նախահաշվային փաստաթղթերի ապահովվածության վերաբերյալ:
Քննարկվող հարցերի շուրջ իրենց տեսակետներն են արտահայտել կառավարական հանձնաժողովի նախագահի տեղակալ, ՀՀ վարչապետի խորհրդական Վլադիմիր Մովսիսյանը, ՀՀ կառավարությանն առընթեր ջրային տնտեսության պետական կոմիտեի նախագահի տեղակալ Ռուդիկ Ղուկասյանը:
Քննարկման արդյունքում աշխատանքային խմբի և շինարարական աշխատանքների ընթացքը գնահատվել է բավարար, համապատասխան հանձնարարականներ են տրվել օբյեկտի շահագործման ընդունման անհրաժեշտ աշխատանքների և ժամկետների վերաբերյալ: Շինարարական աշխատանքների ավարտի նախնական ժամկետ է սահմանվել 2003թ. սեպտեմբերի 30-ը, իսկ օբյեկտի շահագործման ընդունման ժամկետ՝ հոկտեմբերի երկրորդ տասնօրյակը:
