երեքշաբթի, 16 սեպտեմբերի 2003
Այսօր ՀՀ վարչապետ Անդրանիկ Մարգարյանը հանդիպում է ունեցել պաշտոնական այցով Երևան ժամանած Լիտվայի Հանրապետության նախագահ Ռոլանդաս Պակսասի հետ: Վարչապետը հույս է հայտնել, որ Հայաստանի և Լիտվայի միջև ակտիվացող քաղաքական հարաբերությունները կնպաստեն տնտեսական համագործակցության զարգացմանը, հատկապես, երբ դրա համար բոլոր նախադրյալները կան: Անդրանիկ Մարգարյանը կարևորել է տնտեսական, քաղաքական բարեփոխումների ճանապարհին հաջողություններ արձանագրած Լիտվայի փորձը հայ-լիտվական փոխգործակցության ընթացքում նկատի առնելու անհրաժեշտությունը:
Եվրամիության անդամ դարձած Լիտվայի հետ՝ ինտեգրման նույն ուղին ընտրած Հայաստանը, կառավարության ղեկավարի համոզմամբ, գործակցության լայն հնարավորություններ ունի, որոնք բացի երկկողմ հարաբերությունների սերտացումը, ուղղված կլինեն նաև տարածաշրջանում խաղաղության, կայունության հաստատմանն ու տնտեսական զարգացմանը:
Լիտվայի նախագահը վստահեցրել է, որ եվրոպական ընտանիքում իր երկիրը միշտ կլինի Հայաստանի կողմնակիցն ու աջակիցը: Նա ուրախությամբ է նշել, որ այցի ընթացքում արդեն նկատելի է դարձել հայ և լիտվացի գործարարների փոխադարձ հետաքրքրությունը, միմյանց հետ գործակցելու ցանկությունը, ինչը ըստ նրա, հնարավորինս պետք է խթանել: Նախագահ Ռոլանդաս Պակսասը ՀՀ վարչապետին առաջարկել է քննարկել Հարավային Կովկասից Բալթյան երկրներ փոխադրարձաբար շահավետ փոխադրումների իրականացման հնարավորությունները: Վարչապետ Անդրանիկ Մարգարյանը նշել է, որ բավականին հետաքրքիր և հեռանկարային այդ առաջարկը անհրաժեշտ է շատ որոշակի ժամկետում՝ անգամ մինչև այս ամսվա ավարտը, դարձնել մասնագետներից կազմված աշխատանքային խմբի քննարկման առարկա և ըստ այդմ, որոշել հետագա քայլերը:
