երկուշաբթի, 6 դեկտեմբերի 2010
www.e-gov.am-ը լավագույն նորարարական կայքն է Հայաստանում
Շաբաթ` դեկտեմբերի 4-ին, տեղի է ունեցել ArmNet Awards 2010 էլեկտրոնային կայքերի մրցույթը եզրափակող մրցանակաբաշխության պաշտոնական արարողությունը:
Մրցանակաբաշխության ժամանակ «Լավագույն նորարարություն» անվանակարգում միջազգային ժյուրիի կողմից միաձայն լավագույնն է ճանաչվել ՀՀ կառավարության www.e-gov.am կայքը: Մասնավորապես, բարձր է գնահատվել www.e-gov.am նախագծի շրջանակներում ժամանակակից տեխնոլոգիաների հիման վրա ներդրված էլեկտրոնային գործիքների դերը ժողովրդավարացման գործընթացներում:
ArmNet Awards 2010 մրցույթն անցկացվել է երկու փուլով 7 անվանակարգերում` դիզայն և հարմարավետություն, նորարարություն, տեխնիկական կատարում, բովանդակություն, տարվա առաջընթաց, գլխավոր մրցանակ և ժողովրդական ընտրություն: Մրցույթին մասնակցում էին 2008-2010 թթ. ընթացքում հայկական շուկայի համար ստեղծված, Հայաստանի, հայերի, հայկական սփյուռքի մշակույթը, պատմությունը, խնդիրները ներկայացնող և ամբողջությամբ Հայաստանում գրանցված ընկերության կողմից պատրաստված էլեկտրոնային կայքերը:
