Հայաստանի Հանրապետության Կառավարություն

Վարչապետ Տիգրան Սարգսյանն այսօր մասնակցել է Արարատի մարզի Սիփանիկ գյուղի ձկնաբուծական տնտեսություններից մեկում ջրաչափի տեղադրման փորձնական ծրագրի իրականացմանը: Միջոցառմանը ներկա էին ՀՀ գյուղատնտեսության և բնապահպանության նախարարները, պաշտոնատար անձինք, Արարատյան դաշտում գործունեություն ծավալող ձկնաբույծներ: Նշենք, որ ջրաչափի փորձնական տեղադրման պայմանավորվածությունը ձեռք էր բերվել 2011թ. փետրվարի 2-ին վարչապետ Տիգրան Սարգսյանի մոտ կայացած խորհրդակցության արդյունքում` նպատակ ունենալով ցույց տալ ջրաչափի տեղադրման անվտանգությունը և ռիսկայնության բացակայությունը:
Կառավարության ղեկավարին մասնագետների կողմից մանրամասն ներկայացվել են տեղադրման աշխատանքների ընթացքը և տեխնիկական հնարավոր լուծումների արդյունավետության աստիճանը: Ծավալված մտքերի փոխանակման ընթացքում ձկնաբույծները հնչեցրել են իրենց մտահոգությունները ջրաչափիչ սարքերի տեղադրման խնդիրների վերաբերյալ` անհրաժեշտ համարելով յուրաքանչյուր ձկնաբուծական տնտեսության համար անհատական չափորոշիչների կիրառումը:
Անհրաժեշտ համարելով Արարատյան դաշտի ստորերկրյա խորքային (այդ թվում` ինքնաշատրվանող) հորերից ջրային ռեսուրսների հաշվառման, արդյունավետ կառավարման և պահպանության ուղղությամբ միջոցառումների ձեռնարկումը` վարչապետ Սարգսյանը նշել է, որ յուրաքանչյուր ձկնաբուծական տնտեսության համար կիրառվելու են ջրաչափիչ սարքերի տեղադրման անհատական տեխնիկական չափորոշիչներ, և ձկնաբույծները կարող են ինքնուրույնաբար ձեռք բերել ջրաչափիչ սարքեր իրենց նախընտրած ընկերությունից:
Թեմայի առնչությամբ գործադիրի ղեկավարը լրագրողներին է ներկայացրել ձկնաբույծների հետ ծավալված քննարկման արդյունքները. «Մեր նպատակն է կրկնապատկել ձկնաբույծների կարողությունները: 2010թ. մենք ունեցել ենք լուրջ նվաճումներ. շուրջ 500 տոննա ձուկ է արտահանվել Հայաստանի Հանրապետությունից: Կառավարությունը լուրջ ջանքեր է գործադրել, որպեսզի 22 տնտեսվարողներ ստանան արտոնագիր Ռուսաստանում և հնարավորություն ստանան արտահանել իրենց արտադրանքը: Մեր գնահատականներով` 2011թ. այս ցուցանիշը պետք է կրկնապատկվի, քանի որ այն կարողությունները, որ ջրային տնտեսություններն ստեղծել են, արդեն հույս են ներշնչում, որ 2011թ. այդ արտադրանքը մենք ստանալու ենք: Բոլոր ձկնաբուծական տնտեսություններում ներդնելու ենք ստանդարտներ` սկսած ջրաչափերից և ավարտած ձկնաբուծության ոլորտում կիրառվող տեխնոլոգիաներով, որպեսզի վստահ լինենք, որ ձկնաբույծներն աշխատում են սննդի անվտանգության ապահովման կանոններով: Դա բխում է և՛ մեր բնակչության շահերից, և՛ միջազգային բոլոր պարտավորություններից»:
Խոսելով անօրինական ջրօգտագործման հետ կապված խնդիրներից` վարչապետն ընդգծել է. «Տասնյակ համայնքներ այսօր զրկվել են խմելու և ոռոգման ջրից այն պատճառով, որ ջրային ռեսուրսները ռացիոնալ չեն օգտագործվում. կան շուրջ 3500 հորեր, որոնցից 2000-ն անօրինական են, և պետությունը պատշաճ ձևով չի իրականացնում օգտագործվող ջրերի հաշվառում: Այդ խնդիրն առնչվում է նաև ձկնաբուծական ընկերությունների հետ. մեր ուսումնասիրությունները ցույց են տվել, որ կան ձկնաբուծական ընկերություններ, որոնք առանց համապատասխան թույլտվության ունեն խորքային հորեր և այդ ջուրն անօրինական օգտագործում են` ստեղծելով նաև էկոլոգիական ռիսկեր մեզ համար: Անհրաժեշտություն կա հաշվառել ջուրն ամբողջությամբ, և հաշվառման տեսակետից առաջարկում ենք օգտագործել ջրաչափեր այն 60 չափորոշիչների կիրառմամբ, որոնք այսօր պետության կողմից հաստատված են և ընդունելի: Ամեն մի ջրային տնտեսություն իր օգտագործած ջրի ծավալներին համապատասխան պետք է ընտրի, թե ինչ ջրաչափիչ սարք է օգտագործելու»:
Կառավարության ղեկավարն անդրադարձել է նաև վերջին շրջանում ձկնաբուծության ոլորտում մենաշնորհ հաստատելու վերաբերյալ մամուլում տեղ գտած հրապարակումներին. «Քննադատության կա, թե այս ամենը կատարվում է նրա համար, որպեսզի ջրօգտագործողների և ձկնաբույծների ոլորտում ձևավորվեն նոր մոնոպոլիաներ, ինչն, իհարկե, անհեթեթություն է: Մեր գործողությունները վկայում են այն մասին, որ առաջին հերթին հսկողությունն սկսելու ենք իրականացնել խոշոր տնտեսություններից: Դրա համար բնապահպանության նախարարության կայքէջում տեղադրված է այս ձկնաբուծական տնտեսությունների ամբողջական ցանկը` ըստ խոշորության: Մեր բոլոր ստուգումներն ու ջրաչափերի տեղադրումն սկսելու ենք խոշոր ձկնաբուծական ընկերություններից` տեղափոխելով նրանց օրինական դաշտ»:
Տիգրան Սարգսյանը նաև ընդգծել է, որ պետությունը հաշվի է առնելու առկա օբյեկտիվ դժվարությունները հողերի կատեգորիայի տեղափոխման, ջրօգտագործման պայմանագրերի կնքման, վերակնքման և ժամկետների երկարաձգման հետ կապված` ընդառաջելով ձկնաբույծներին այդ հարցերում. «Ստեղծելու ենք բարենպաստ պայմաններ, որպեսզի ձկնաբուծությամբ զբաղվելը նրանց համար չլինի ծախսատար, և 2011 թ. արտահանումն այս ոլորտում կրկնապատկվի»:
Այնուհետև վարչապետը պատասխանել է լրատվամիջոցների ներկայացուցիչների հարցերին: