չորեքշաբթի, 23 փետրվարի 2011
Հաստատվել են ՀՀ ԱՎԶՀ 2010թ. գործունեության և ֆինանսական հաշվետվությունները
Այսօր կառավարությունում տեղի է ունեցել Հայաստանի Հանրապետության անտառների վերականգնման և զարգացման հիմնադրամի (ՀՀԱՎԶՀ) հոգաբարձուների խորհրդի հերթական նիստը, որը վարել է վարչապետ, հոգաբարձուների խորհրդի նախագահ Տիգրան Սարգսյանը:
Օրակարգի հարցերի շարքում ՀՀ ԱՎԶՀ գործադիր տնօրեն Վլադիմիր Մովսիսյանը ներկայացրել է հիմնադրամի 2010թ. գործունեության հաշվետվությունը։ Նա անդրադարձել է 2010թ. ընթացքում անտառների վերականգնման և զարգացման ծրագրերի մշակման ու դրանց իրականացման ուղղությամբ կատարված աշխատանքներին: Խորհրդի անդամներին է ներկայացվել նաև հիմնադրամի 2010թ. ֆինանսական հաշվետվությունը ֆինանսական միջոցների ստացման, տնօրինման և դրանց նպատակային օգտագործման վերաբերյալ: Հոգաբարձուների խորհուրդը հաստատել է ներկայացված հաշվետվությունները:
Անդրադառնալով հիմնադրամի 2011թ. անելիքներին` Վլադիմիր Մովսիսյանը զեկուցել է Երևանի անտառտնտեսության Էրեբունու անտառպետության 51 հա տարածքում ոռոգման համակարգի ստեղծման և անտառապատման աշխատանքների ծրագրերի մասին, որոնք հավանության են արժանացել խորհրդի անդամների կողմից: Նշված ծրագրերի շրջանակում առաջին փուլով նախատեսվում է հիմնել 20 հա անտառտարածք` իր ցանկապատով, երկրորդ փուլում` 2012թ., անտառապատել մնացած 31 հա տարածքը:
Մեկ այլ հարցով հաստատվել են ՀՀ ԱՎԶՀ 2011թ. հաստիքացուցակն ու գործադիր մարմնի պահպանման ապարատի ծախսերի նախահաշիվը:
