հինգշաբթի, 23 հոկտեմբերի 2003
ՀՀ վարչապետ Անդրանիկ Մարգարյանն այսօր ընդունել է Բուլղարիայի Հանրապետության պաշտպանության նախարար Նիկոլայ Սվինարովին և նրա գլխավորած պատվիրակությանը:
Զրույցի ընթացքում, արձանագրելով, որ վերջին տարիներին քաղաքական, տնտեսական, մշակութային բնագավառներում ձևավորվել են հայ-բուլղարական բավականին բարձր մակարդակի հարաբերություններ, կողմերը կարևորել են նաև Հայաստանի և Բուլղարիայի միջև պաշտպանության և անվտանգության ոլորտում համագործակցության զարգացումը: Նրանք հեռանկարային են համարել փոխգործակցությունը, մասնավորապես, ռազմաարդյունաբերական, զինված ուժերի բարեփոխումների բնագավառներում:
Վարչապետ Անդրանիկ Մարգարյանը Հայաստանի համար կարևորել է նաև ՆԱՏՕ-ի «Գործընկերություն հանուն խաղաղության» ծրագրի շրջանակներում Բուլղարիայի հետ փորձի փոխանակումը, որի առաջին քայլերից մեկը, ըստ նրա, Հայաստանում անցկացված «Համատեղ լավագույն ջանք-2003» զորավարժություններում հայ և բուլղարացի անձնակազմերի արդյունավետ համագործակցությունն էր:
Ընդհանուր և տարածաշրջանային անվտանգության տեսակետից վարչապետ Անդրանիկ Մարգարյանը և Բուլղարիայի պաշտպանության նախարար Նիկոլայ Սվինարովը ընդգծել են ՏՐԱՍԵԿԱ-ի և Սևծովյան տնտեսական համագործակցության ծրագրերի շրջանակներում փոխգործակցության խթանման անհրաժեշտությունը: Դրա արդյունավետության վկայություններից է, ըստ նրանց, վերջերս ստորագրված Հայաստան-Վրաստան-Բուլղարիա եռակողմ համաձայնագիրը, որը լայն հնարավորություններ է բացում տնտեսական կապերի ակտիվացման, Սևծովյան տարածաշրջանը առևտրատրանսպորտային կայուն միջանցքի վերածելու համար:
Նշելով, որ Հայաստանը հաստատակամ է եվրոպական կառույցներին ինտեգրվելու իր քաղաքականության մեջ, Անդրանիկ Մարգարյանն ընդգծել է նաև այդ խնդրում Բուլղարիայի Հանրապետության փորձը, մանավանդ որ Բուլղարիան 2004թ.-ին ստանձնելու է եվրոպական կարևոր կառույցներից մեկի՝ ԵԱՀԿ-ի նախագահությունը: Պաշտպանության նախարար Նիկոլայ Սվինարովը ևս ողջունել է այդ ասպարեզում երկու երկրների միջև համագործակցության ակտիվացումը, հավաստիացնելով, որ ԵԱՀԿ նախագահող երկրի կարգավիճակում Բուլղարիան ամեն ջանք գործադրելու է ղարաբաղյան հակամարտության խաղաղ կարգավորման համար:
