ուրբաթ, 24 հոկտեմբերի 2003
ՀՀ վարչապետ Անդրանիկ Մարգարյանն այսօր ընդունել է Հայաստանում Լիբանանի Հանրապետության նորանշանակ արտակարգ և լիազոր դեսպան Ժիբրայիլ Բուտրոս Ժաարային:
Շնորհավորելով դեսպանին մեր երկրում իր դիվանագիտական առաքելությունն ստանձնելու կապակցությամբ, վարչապետը հույս է հայտնել, որ նրա գործունեությունը կնպաստի հայ-լիբանանյան հարաբերությունների հետագա զարգացմանը:
Գոհունակություն հայտնելով Հայաստանի և Լիբանանի միջև քաղաքական հարաբերությունների ներկա մակարդակից, կողմերը նշել են առևտրա -տնտեսական համագործակցությունը ևս ավելի ակտիվացնելու անհրաժեշտությունը: Այդ տեսակետից նրանք կարևորել են, մասնավորապես, երկու երկրների գործարար շրջանակների միջև կապերի ու շփումների աշխուժացումը, գործարար համաժողովների, ցուցահանդեսների կազմակերպումը: Վարչապետ Անդրանիկ Մարգարյանը ընդգծել է, որ Հայաստանի կառավարությունը պատրաստակամ է աջակցելու երկկողմ առևտրատնտեսական հարաբերությունների խթանմանն ուղղված ցանկացած նախաձեռնության, այդ գործում նշելով նաև Լիբանանի մեծաթիվ հայ համայնքի հնարավորությունների օգտագործումը:
Զրույցի ընթացքում կողմերն անդրադարձել են նաև երկու երկրների և ժողովուրդների միջև ավանդական բարեկամական հարաբերությունների, հատկապես մշակութային կապերի հեետագա զարգացմանը: Որպես այդ նպատակին ուղղված կարևոր քայլերից մեկը՝ նրանք նշել են Լիբանանի ազգային սիմֆոնիկ նվագախմբի և Լիբանանում ՀՀ դեսպանության սերտ համագործակցությամբ այս տարվա նոյեմբերին նախատեսվող Արամ Խաչատրյանի 100-ամյակին նվիրված համերգի կազմակերպումը՝ Հայաստանից հրավիրված մենակատարի մասնակցությամբ:
Հանդիպման ավարտին վարչապետ Անդրանիկ Մարգարյանը հաջողություններ է մաղթել նորանշանակ դեսպանին՝ Հայաստանում իր դիվանագիտական գործունեությունն իրականացնելու շրջանում:
