երկուշաբթի, 10 նոյեմբերի 2003
Տեղական ինքնակառավարման մարմինների առաջին ընտրությունների 7-ամյակի կապակցությամբ այսօր ՀՀ կառավարության նիստերի դահլիճում հրավիրված հանդիսավոր նիստի մասնակիցներին ողջունել է ՀՀ վարչապետ Անդրանիկ Մարգարյանը: Իր խոսքում վարչապետը, մասնավորապես, նշել է.
«Հանդիսավոր նիստի հարգելի մասնակիցներ
Թույլ տվեք շնորհավորել տեղական ինքնակառավարման մարմինների առաջին ընտրությունների 7-ամյակի կապակցությամբ:
Հատկանշական է, որ ավանդական դարձած այլ տոներից և տոնակատարություններից բացի մենք նշում ենք նաև ժողովրդավարական ինստիտուտների ներդրման տարեդարձը:
Սա մեր հասարակության մտածողության, արժեքային համակարգի փոփոխության ամենախոսուն վկայություններից է:
Այս տարիների ընթացքում տեղական ինքնակառավարումը տարեցտարի ամրապնդվել է՝ իր կայացմանը զուգընթաց ստանալով պետական աջակցություն: Ապակենտրոնացումը եղել և մնում է պետական քաղաքականության առանցքում և, իմ համոզմամբ, 7 տարվա անդրադարձ անելով կարող ենք արձանագրել, որ ի դեմս տեղական ժողովրդավարության մենք ունենք քաղաքացիական հասարակության ամուր հիմք:
Չմոռանանք նաև, որ այս հիմքերը դեռևս պետք է ամրապնդվեն:
Ամրապնդվեն օրենսդրությամբ, պետական քաղաքականությամբ, մեր ամենօրյա աշխատանքով ու նախաձեռնություններով:
1996թ. նոյեմբերի 10-ին կայացած տեղական ինքնակառավարման մարմինների՝ համայնքների ղեկավարների և ավագանիների առաջին ընտրություններով մեր երկրում ներդրվեց գաղափարական և քաղաքական առումով նախադեպը չունեցող տեղական ինքնակառավարման նոր, ժողովրդավարական համակարգ: Տեղական ինքնակառավարման պատմական ավանդույթների և կառավարման փորձառության բացակայությունն ինքնստինքյան ենթադրում էր, որ համակարգի արդյունավետ գործունեությունն ապահովող շատ հարցեր և մոտեցումներ կձևավորվեն և իրենց լուծումը կստանան ոլորտի կայացմանը զուգահեռ:
Փորձի վերլուծության արդյունքներով էր պայմանավորված «Տեղական ինքնակառավարման մասին» Հայաստանի Հանրապետության նոր օրենքի ընդունումը: Այն հիմնականում համապատասխանում է «Տեղական ինքնակառավարման մասին» եվրոպական հռչակագրում ամրագրված սկզբունքներին: Այդ հռչակագրի սկզբունքների ընդունումն ու այդ հռչակագրին միանալը Եվրոպայի խորհրդին անդամակցելու Հայաստանի Հանրապետության պարտավորությունների ցանկում էին: Տարածքային և տեղական ժողովրդավարությունների խորացմանն ուղղված, Եվրոպայի խորհրդին անդամակցելու Հայաստանի Հանրապետության պարտավորությունները, փաստորեն, կատարվել են ամբողջ ծավալով և ժամանակին:
Կուզենայի նշել, որ «Տեղական ինքնակառավարման մասին» Հայաստանի Հանրապետության նոր օրենքի մշակման աշխատանքներին մեծ օժանդակություն են ցուցաբերել համայնքների ղեկավարները և ավագանիները, համայնքների հասարակական կազմակերպություններն ու պետական և տարածքային կառավարման մարմինները, այս ոլորտում մեզ հետ համագործակցող բոլոր միջազգային կազմակերպությունները, Եվրոպայի խորհրդի համապատասխան կառույցները, փորձագետները, իսկ օրենքի նախագիծը մշակվել է գերմանական տեխնիկական համագործակցության երևանյան գրասենյակի (GTZ) ամբողջական օժանդակությամբ:
Անչափ կարևորում եմ համայնքի ավագանու դերը, որը տարեցտարի ամրապնդում է իր դիրքերը և արդյունավետ դարձնում գործունեությունը: Այսօր ավագանին այլևս համայնքի ղեկավարի կցորդը չէ, այլ իր հստակ տեղը, ասելիքն ու ծրագիրն ունեցող մարմին, որն աստիճանաբար զարգացում է ապրում: Ես հուսով եմ, որ համայնքի ղեկավարներն ու ավագանու անդամները կկարողանան կատարել ժողովրդին տված իրենց խոստումները և վստահեցնում եմ, որ այդ գործում նրանք կունանան կառավարության աջակցությունը:
Ի դեպ, գույքահարկի և հողի հարկի գանձման գործառույթն արդյունավետ կազմակերպելու նպատակով այսօր բոլոր քաղաքային համայնքներին կտրամադրվի անհրաժեշտ ժամանակակից համակարգչային տեխնիկա: Այս միջոցառումն իրականացվել է գերմանական տեխնիկական համագործակցության «Համայնքային զարգացման խրախուսում» ծրագրի կողմից և օգտվելով առիթից, թույլ տվեք մեր երախտագիտությունը հայտնել Գերմանիայի Դաշնային Հանրապետության կառավարությանը՝ ի դեմս դեսպան մեծարգո պարոն Բալթերսի և ծրագրի ղեկավար պարոն Դիքսի:
Ամփոփելով ասեմ, որ տեղական ինքնակառավարման համակարգը ապրում է բնականոն զարգացում և ժողովրդավարական այս կարևորագույն ինստիտուտի գոյությունը Հայաստանի Հանրապետությունում արդեն իսկ իրողություն է:
Կրկին շնորհավորում եմ տեղական ինքնակառավարման մարմինների առաջին ընտրությունների 7-ամյակի կապակցությամբ»:
