երկուշաբթի, 11 հուլիսի 2011
Վարչապետն ընդունել է Ուկրաինայի Գերագույն Ռադայի նախագահ Վլադիմիր Լիտվինին
Վարչապետ Տիգրան Սարգսյանն այսօր ընդունել է Ուկրաինայի Գերագույն Ռադայի նախագահ Վլադիմիր Լիտվինի գլխավորած պատվիրակությանը:
Ողջունելով հյուրերին ՀՀ կառավարությունում` վարչապետը բարձր է գնահատել երկու երկրների միջև ձևավորված քաղաքական երկխոսության մակարդակը և կարևորել Վլադիմիր Լիտվինի այցը Հայաստան հայ-ուկրաինական փոխհարաբերությունների խորացման համատեքստում:
Հայ-ուկրաինական տնտեսական փոխգործակցության ընդլայնման գործում վարչապետ Սարգսյանն ընդգծել է առկա ողջ ներուժի լիարժեք իրացման անհրաժեշտությունը և այդ առումով կարևորել միջկառավարական հանձնաժաղովի աշխատանքները։ Հանդիպման ընթացքում կողմերը քննարկել են գյուղատնտեսության, շինարարության, էներգետիկայի, սննդարդյունաբերության, մեքենաշինության, տեղեկատվական տեխնոլոգիաների, դեղագործության և զբոսաշրջության բնագավառներում գործակցության զարգացման, ինչպես նաև միջտարածաշրջանային կապերի սերտացման հեռանկարները: Հայ և ուկրաինացի գործարարների միջև շփումների ակտիվացման առումով փոխադարձաբար ընդգծվել է գործարար համաժողովների անցկացման կարևորությունը։
Զրուցակիցները կարևորել են հումանիտար կապերի ամրապնդման ուղղությամբ, մասնավորապես, մշակույթի, կրթության և գիտության ոլորտներում ծրագրերի իրականացումը: Անդրադարձ է կատարվել երկու երկրներում ընթացող բարեփոխումներին: Նշվել է, որ տնտեսական հարաբերություններին նոր լիցք կարող են հաղորդել թե՛ միջկառավարական հանձնաժողովի աշխատանքները, թե՛ բարձր մակարդակի փոխայցելությունները: Վարչապետ Տիգրան Սարգսյանը վերահաստատել է իր ուկրաինացի գործընկերոջը` Նիկոլայ Ազարովին ուղղված Հայաստան այցելելու հրավերը:
