չորեքշաբթի, 26 նոյեմբերի 2003
ՀՀ վարչապետ Անդրանիկ Մարգարյանն այսօր հանդիպում է ունեցել պաշտոնական այցով Հայաստանում գտնվող Տաջիկստանի Հանրապետության նախագահ Էմոմալի Ռահմոնովի հետ:
Վարչապետը հույս է հայտնել, որ նախագահ Ռահմոնովի այցը մեր երկիր, նոր խթան կհանդիսանա երկկողմ հարաբերությունների զարգացման, ձեռք բերված պայմանավորվածությունները հնարավորինս արագ կյանքի կոչելու գործում: Անդրանիկ Մարգարյանն ընդգծել է, որ Հայաստանի կառավարությունը պատրաստ է իր իրավասությունների և հնարավորությունների շրջանակում նպաստել համագործակցության ընդլայնմանն ու զարգացմանը և այդ հարցում մեծ տեղ է վերապահում հայ-տաջիկական միջկառավարական հանձնաժողովի աշխատանքին, որի նիստը նախատեսվում է անցկացնել 2004թ. փետրվարին: Հայաստանի և Տաջիկստանի տնտեսվարող սուբյեկտների, կազմակերպությունների ու գործարարների միջև ուղղակի կապերի հաստատման համար վարչապետ Անդրանիկ Մարգարյանը և նախագահ Էմոմալի Ռահմոնովը կարևորել են Երևանում և Դուշանբեում գործարար համաժողովների, ցուցահանդեսների կազմակերպման հնարավորության քննարկումը միջկառավարական հանձնաժողովի շրջանակներում: Հավանության է արժանացել նաև առևտրի կենտրոնի հիմնման գաղափարը:
Տաջիկստանի նախագահ Էմոմալի Ռահմանովը ևս վերահաստատել է երկարամյա և ամուր փոխգործակցության իր երկրի պատրաստակամությունը: Նա նշել է, թե լավատեսորեն է տրամադրված Հայաստանի և Տաջիկստանի միջև զարգացող հարաբերությունների նկատմանբ և տարբեր բնագավառներում հետագա համագործակցության լայն հնարավորություններ է տեսնում: Դրա համար, ըստ նախագահ Ռահմոնովի, որոշակի հիմքեր արդեն դրվել են, որոնցից հատկանշականը անցյալ տարվա ապրիլին ՀՀ նախագահ Ռոբերտ Քոչարյանի պաշտոնական այցի շրջանակներում Հայաստանի և Տաջիկստանի միջև բարեկամության և համագործակցության մասին պայմանագրի ստորագրումն էր:
Տաջիկստանի նախագահն ու ՀՀ վարչապետը ներկայացրել են երկու երկրների տնտեսական հնարավորությունները, իրականացվող և նախատեսված ծրագրերը: Նախագահ Էմոմալի Ռահմոնովի հավաստմամբ, չնայած իր երկիրը բավականին հարուստ է բնական ռեսուրսներով և այժմ երկրում ծավալուն աշխատանքներ են իրականացվում արդյունաբերության, գյուղատնտեսության, շինարարության և մի շարք այլ բնագավառներում, այդուհանդերձ դեռևս բարձր է աղքատության մակարդակը: Նա նշել է, որ ինչպես Հայաստանում, Տաջիկստանում ևս միջազգային կազմակերոպությունների աջակցությամբ մշակվել է աղքատության հաղթահարման ծրագիր:
Զրույցի ընթացքում կողմերը հավաստել են, որ երկկողմ քաղաքական հարաբերությունների բարձր մակարդակը հնարավորություն է տալիս արդյունավետորեն համագործակցելու նաև միջազգային կազմակերպությունների շրջանակներում, ինչը միջինասիական և հարավկովկասյան տարածաշրջաններում կայունության պահպանման, միջազգային ահաբեկչության դեմ պայքարի կարևոր պայմաններից է: Նրանք հույս են հայտնել, որ առաջիկայում համագործակցությունը նշված շրջանակներում ավելի կխորանա:
