ուրբաթ, 28 հոկտեմբերի 2011
Տիգրան Սարգսյանը հանձնարարել է համապատասխան գերատեսչությունների ղեկավարներին՝ բնապահպանների հետ քննարկել նրանց բարձրացրած հարցերն ու առաջարկությունները
Վարչապետ Տիգրան Սարգսյանի գլխավորությամբ այսօր կառավարությունում տեղի է ունեցել Հայաստանի կայուն զարգացման ազգային խորհրդի հերթական նիստը: Վերջինիս մասնակիցները քննարկել և հաստատել են 2012 թվականին Բրազիլիայի Ռիո-դե-Ժանեյրո քաղաքում կայանալիք ՄԱԿ-ի «Ռիո+20» համաշխարհային գագաթաժողովում Հայաստանի Հանրապետության ներկայացվելիք առաջարկությունները, որոնք քննարկել և ներկայացրել է ՀՀ բնապահպանության, Արտաքին գործերի նախարարությունների ու բնապահպանական հասրակական կազմակերպությունների կողմից ձևավորված աշխատանքային խումբը:
Այնուհետև, նիստին մասնակից բնապահպանական հասարակական կազմակերպությունների ներկայացուցիչներն իրենց տեսակետներն են ներկայացրել Թռչկանի ջրվեժի վրա փոքր հէկի կառուցման և Սևանա լճին հարակից տարածքում՝ Սոտքում, ոսկու կորզման ֆաբրիկայի գործունեության շուրջ: Այս կապակցությամբ, ՀՀ բնապահպանության և Էներգետիկայի ու բնական պաշարների նախարարները ներկայացրել են համապատասխան փաստարկներ: Վարչապետ Սարգսյանը հանձնարարել է վերջիններիս՝ բնապահպանների հետ քննարկել բարձրացված հարցերն ու ներկայացվող առաջարկությունները:
Տիգրան Սարգսյանը հիշեցրել է, որ գործում է ՀՀ Նախագահին առընթեր Սևանա լճի հիմնախնդիրներն ուսումնասիրող հանձնաժողով, որտեղ աշխատում են մեծ փորձառություն ունեցող մասնագետներ: «Սևանա լճի խնդիրը գտնվում է Հանրապետության ղեկավարի ուշադրության ներքո: Առանց այս հանձնաժողովի եզրակացության՝ կառավարությունը որևէ գործողություն չի իրականացնում: Կոչ եմ անում համագործակցել հանձնաժողովի հետ՝ ձեր բոլոր մտահոգությունները փարատելու համար»,- դիմելով բնապահպաններին՝ ասել է վարչապետը:
