Հայաստանի Հանրապետության Կառավարություն

Հոլոքոսթը, ինչպես հաստատվեց 2000թ. հունվարին ընդունված Ստոկհոլմի միջազգային համաժողովի հռչակագրով, ոտնձգություն էր մարդկային քաղաքակրթության հիմքերի դեմ: Գիտակցելով մեր պատասխանատվությունը՝ պայքարելու ցեղասպանություն չարիքի, էթնիկ զտումների, ռասայականության, հակասեմիտիզմի, իսլամաֆոբիայի, քսենոֆոբիայի դեմ, մենք՝ Ստոկհոլմի 2004թ. «Ցեղասպանության կանխարգելում, սպառնալիքներ և պատասխանատվություն» միջազգային համաժողովի մասնակիցներս, մեր խոր մտահոգությունն ենք հայտնում պատմության վերջին շրջանում ցեղասպանությունների, զանգվածային սպանությունների և էթնիկ զտումների կրկնվողականության, ինչպես նաև այդպիսի հանցագործությունների համատարած անպատժելիության առումով: Մենք նպատակ ունենք անելու հնարավորը՝ այդպիսի հանցագործությունները կանխարգելելու և ավելի ապահով ապագա կառուցելու համար:

Այսպիսով մենք հայտարարում ենք.

1. Մենք հանձն ենք առնում օգտագործել և զարգացնել բոլոր մեխանիզմները, որպեսզի կարողանանք որքան հնարավոր է շուտ իմանալ ցեղասպանության սպառնալիքների մասին և կանխարգելել ցեղասպանությունները, զանգվածային սպանություններն ու էթնիկ զտումները:

2. Մենք պատասխանատվություն ենք ստանձնում մեր աջակցությունը ցուցաբերելու մարդկանց այն խմբերին, որոնք կարող են դառնալ ցեղասպանության, զանգվածային սպանության և էթնիկ զտումների զոհ: Եվ կօգտագործենք բոլոր միջոցները՝ կանխարգելելու համար նման դաժանությունները՝ միջազգային օրենքների և Ցեղասպանության կանխարգելման կոնվենցիայի շրջանակներում:

3. Մենք վստահեցնում ենք, որ ցեղասպանության մեղավորները պետք է պատասխանատվության ենթարկվեն: Նաև ամեն ինչ կանենք ցեղասպանություններից փրկվածներին աջակցելու, նրանց բնականոն կյանքի վերադարձնելու համար:

4. Մենք կաջակցենք ցեղասպանության, զանգվածային սպանությունների և էթնիկ զտումների կանխարգելման հնարավորությունների ուսումնասիրությունների իրականացմանը:

5. Մենք հանձն ենք առնում բոլոր պաշտոնական և ոչ պաշտոնական ուսումնական հաստատությունների միջոցով կրթել երիտասարդներին և լայն հասարակությանը՝ ցեղասպանության բոլոր տեսակի վտանգների դեմ պայքարի ոգով: Նաև այդ վտանգների մասին գիտելիքներ կփոխանցենք այն մարդկանց, ովքեր ընդգրկված են կառավարություններում, միջազգային և ոչ կառավարական կազմակերպություններում, մարդասիրական և խաղաղարար ձեռնարկումներում, ինչպես նաև ԶԼՄ-ներին:

6. Մենք մանրամասն կուսումնասիրենք ցեղասպանության դեմ պայքարի բոլոր տարբերակները, որոնք ներկայացվեցին այս համաժողովում, այդ թվում՝ ՄԱԿ-ի գլխավոր քարտուղարի կողմից արված կոնկրետ առաջարկները:

7. Մենք հանձն ենք առնում համագործակցել բոլոր ազգերի, ՄԱԿ-ի և այլ կազմակերպությունների հետ, ինչպես նաև ոչ կառավարական, աշխատանքային կազմակերպությունների, ԶԼՄ-ների և գործարար ու գիտական շրջանակների հետ՝ ցեղասպանության սպառնալիքների դեմ արդյունավետ միջոցների որոնման գործում: