Հայաստանի Հանրապետության Կառավարություն

ՀՀ վարչապետ Անդրանիկ Մարգարյանն այսօր ընդունել է Արժույթի միջազգային հիմնադրամի պատվիրակությանը՝ հիմնադրամի առաքելության ղեկավար Էնրիկե Գելբարդի գլխավորությամբ: Պատվիրակության կազմում է եղել նաև Հայաստանում հիմնադրամի մշտական ներկայացուցիչ Ջեյմս Մաքյուն:

Նշելով, որ Հայաստանի կառավարության և առավելապես ֆինանսների և էկոնոմիկայի նախարարության հետ, իբրև հիմնական գործընկեր, հիմնադրամը բավականին արդյունավետ համագործակցում է և այն զարգացնելու լավ հիմքեր են դրված, ՀՀ վարչապետն ու ԱՄՀ առաքելության ղեկավարը զրույցի ընթացքում անդրադարձել են մինչ այժմ մի շարք ոլորտներում իրականացված բարեփոխումներին: Արձանագրելով դրանցում նկատելի որոշակի առաջընթացը՝ նրանք նշել են, որ դեռևս աշխատանքների բարելավման լրացուցիչ հնարավորություններ կան մի քանի ոլորտներում, այդ թվում՝ հարկային, մաքսային, բանկային:

Վարչապետ Անդրանիկ Մարգարյանը և ԱՄՀ առաքելության ղեկավար Էնրիկե Գելբարդը հույս են հայտնել, որ արծարծված խնդիրների վերաբերյալ փորձագետների հետ առաջիկա քննարկումների ընթացքում հնարավոր կլինի նախադրյալներ ստեղծել երկկողմ համագործակցության հետագա զարգացման համար: