երեքշաբթի, 21 մայիսի 2013
e-Guillotine–ը մեկտեղելու է Հայաստանում գործող բիզնես գործընթացները և դրանք սահմանող իրավական ակտերը
ՀՀ կառավարության մամուլի կենտրոնում այսօր կայացել է «e-Guillotine բիզնես գործընթացների և դրանք սահմանող իրավական ակտերի շտեմարանի գործարկում» թեմայով ասուլիս: Ինչպես նշել է ՀՀ կառավարության աշխատակազմի Օրենսդրության կարգավորման ազգային կենտրոնի տնօրեն Արմեն Եղիազարյանը, տվյալների բազան պարունակում է մոտ 2500 իրավական ակտ: Ըստ նրա` շտեմարանի գործարկման նպատակներից է հանրությանը տեղեկացնել, թե տվյալ բիզնես գործընթացն ինչ օրենսդրական ակտերով է կարգավորվում: Բացի այդ, ՀՀ քաղաքացիներին հնարավորություն է տրվում օնլայն մասնակցել օրենսդրական կարգավորման աշխատանքներին` ներկայացնելով կարծիքներ և առաջարկություններ: «e-Guillotine–ը մեկտեղելու է մեր երկրում գործող բիզնես գործընթացները և դրանք սահմանող իրավական ակտերը: Սա ինտերակտիվ համագործակցության գործիք է, որը մեզ կօգնի հաշվի առնել նաև հանրության կարծիքը»,-ասել է Ա.Եղիազարյանը:
Միջազգային փորձագետ, «Սենս Քոնսալթինգ» ընկերության տնօրեն Վեդրան Անտոլյակի խոսքերով` e-Guillotine-ի նպատակներից է ՀՀ քաղաքացիներին, ինչպես նաև մասնավոր հատվածին ներգրավել օրենսդրական դաշտն ավելի հստակ դարձնելու գործընթացին: Ըստ նրա` Հայաստանի համար ստեղծված e-Guillotine-ն ամբողջությամբ հարմարեցված է հայաստանյան վարչական միջավայրին, իրավական դաշտին:
