երեքշաբթի, 4 հունիսի 2013
Օդային փոխադրումների ազատականացումը կնպաստի ծառայությունների որակի բարձրացմանը. Արտյոմ Մովսեսյան
Հայաստանի անցնումն օդային փոխադրումների ազատականացմանը կնպաստի այս ոլորտում մրցակցության ապահովմանը, ծառայությունների մատուցման որակի բարձրացմանը, ինչպես նաև դրական ազդեցություն կունենա Հայաստանի տնտեսության վրա: ՀՀ կառավարության մամուլի կենտրոնում հրավիրված ասուլիսում նման կարծիք է հայտնել ՀՀ քաղաքացիական ավիացիայի գլխավոր վարչության պետ Արտյոմ Մովսեսյանը՝ անդրադառնալով գործադիրի կողմից ընդունված օդային փոխադրումների ազատականացման ռազմավարությանը:
«Հայաստանի Հանրապետությունն արդեն այսօր իրականացնում է բաց երկնքի քաղաքականություն: Երեք օդուղիների շուրջ անցկացնելու ենք մրցույթներ, որոնց կարող են մասնակցել միայն հայկական ավիաընկերություններ: Գործունեության թույլտվությունները տալու ենք մինչև հինգ տարի ժամկետով: Միաժամանակ, պետությունը որևէ ավիաընկերության նկատմամբ հովանավորչական պարտավորություններ չի ստանձնելու»,- ասել է Մովսեսյանը:
ՀՀ քաղավիացիայի գլխավոր վարչության պետը նշել է, որ հայկական ավիաընկերությունները, որոնք գործունեություն են ծավալելու, առաջնային կերպով օգտվելու են «Արմավիա»-ի կադրային ռեզերվից, որն ունի մեծ փորձ և ներուժ:
Արտյոմ Մովսեսյանը միաժամանակ տեղեկացրել է, որ նախատեսվում է ազատականացնել նաև ԵՄ-ի հետ օդային փոխադրումները:
