երկուշաբթի, 1 հուլիսի 2013
Անդրանիկ Անդրեասյան. «Բոլոր թերությունները վերացվել են կապալառու կազմակերպությունների միջոցներով»
ՀՀ կառավարության մամուլի կենտրոնում այսօր տեղի է ունեցել ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանի մամուլի ասուլիսը` նվիրված Վերահսկիչ պալատի հաշվետվությանը: Հիշեցնենք, որ ՎՊ հաշվետվության համաձայն` «Ջրային տնտեսության ծրագրերի իրականացման գրասենյակ» պետական հիմնարկում ընտրանքային կարգով 8 օբյեկտներում իրականացված 986,090,0 հազ. դրամի հիմնանորոգման աշխատանքների ստուգման արդյունքում արձանագրվել է 47,158,2 հազ. դրամի անորակ և վերականգնման ենթակա գումարի խախտում:
Ինչպես նշել է Ա.Անդրեասյանը, անորակ աշխատանքներ են համարվել ջրանցքների բետոնապատման ժամանակ շեպերում առաջացած մակերևութային ճաքերը: Ըստ նրա` նման ճաքերն առաջանում են թարմ տեղադրված բետոնի վրա, շատ արագ չորանալուց, հատկապես , եթե բետոնի մեջ ավելացված են հավելանյութեր, որոնք դանդաղացնում են ամրացման ընթացքը: Ճաքեր առաջանում են նաև արևի ուղղակի ճառագայթներից և քամու ազդեցությունից բետոնի մակերևույթի արագ չորացման պատճառով:
Կոմիտեի նախագահի դիտարկմամբ` ջրանցքների վերականգնողական աշխատանքներն իրականացվել են ոչ ոռոգման սեզոնին` ձմռանը, ուստի ճաքերի առաջացման նպաստող գործոններն օբյեկտիվ պատճառներով են եղել: Նա նշել է, որ հետագայում բոլոր ճաքերը և թերությունները վերացվել են կապալառու կազմակերպությունների միջոցներով:
Ա.Անդրեասյանն անդրադարձել է նաև Թալինի մայր ջանցքի շրջադարձերի որոշ հատվածներում ջրանցքից ջրի արտահոսքին` նշելով, որ ներկայումս ջրանցքի այդ հատվածը բարձրացված է և ջրի արտահոսք տեղի չի ունենում:
