չորեքշաբթի, 3 հուլիսի 2013
Վահրամ Ավանեսյան. «ՓՄՁ աջակցման ծրագիրն արդյունավետ է և պետք է շարունակվի»
ՀՀ կառավարության մամուլի կենտրոնում այսօր կայացած ասուլիսում Վերահսկիչ պալատի 2012թ-ի հաշվետվության վերաբերյալ պարզաբանումներ է ներկայացրել
ՀՀ էկոնոմիկայի նախարար Վահրամ Ավանեսյանը:
Առաջին հերթին նախարարն անդրադարձել է Հայաստանում 100 մլն դրամ արժողությամբ տեղադրված երկու բիոզուգարաններին, որոնց ծախսը ՎՊ-ն անարդյունավետ էր գնահատել: Նա նշել է, որ դրանք տեղադրված են և աշխատում են:
Ինչ վերաբերում է զբոսաշրջության աջակցման ծառայությունների վերաբերյալ ՎՊ դիտարկումներին, թե նախարարությունը համատարած ստուգումներ չի իրականացրել, Վ.Ավանեսյանը նշել է, որ ստուգումները կատարվում են ռսիկերի հիման վրա, քանի որ դա հնարավորություն է տալիս տեսչական մարմինների կողմից տնտեսվարողների վրա լրացուցիչ բեռ չդնել:
ՎՊ-ն անարդյունավետ է գնահատել նաև էկոնոմիկայի նախարարության կողմից իրականացվող փոքր և միջին ձեռնարկությունների աջակցման ծրագիրը: Մինչդեռ, ըստ Վ.Ավանեսյանի, ծրագիրն արդյունավետ է և պետք է շարունակվի:
Նախարարի դիտարկմամբ` hիմնական պատճառը այն է, որ սկսնակ սուբյեկտներին տրված ֆինանսական միջոցներն արդյունավետ չեն եղել, քանի որ սկսակ ձեռնարկատերերի ձեռնարկությունների մի մասը փակվել են: Վ.Ավանեսյանը նշել է, որ ձեռնարկություններն առաջին տարում կարող են լուծարվել և դրանում ոչ մի զարմանալի բան չկա:
Անդրադառնալով Գյումրում տեխնոպարկի ծրագրի վերաբերյալ ՎՊ հաշվետվությանը՝ նախարարը նշել է, որ հաշվետվության համաձայն` ծրագիրն անորոշ վիճակի մեջ է: «Մինչդեռ դա այդպես չէ, ծրագիրը հաստատված է և ունի իր ցուցանիշները: Բազմաթիվ փոքր և միջին ընկերություններ ցանկություն ունեն Գյումիում ստեղծել իրենց գրասենյակները, իսկ ընդհանուր գնահատականներով 10 տարվա ընթացքում այստեղ կստեղծվի շուրջ 8 հազար աշխատատեղ»,- ասել է էկոնոմիկայի նախարարը:
