հինգշաբթի, 18 հուլիսի 2013
Կառավարությունում ստորագրվել են երկու համաձայնագրեր
Հուլիսի 18-ին ՀՀ կառավարությունում ստորագրվել են համաձայնագրեր ՀՀ էկոնոմիկայի, ՀՀ առողջապահության նախարարությունների և «Գլոբալ Մեդիքլ Սոլյուշնս» ՓԲԸ-ի, ինչպես նաև Հայաստանի Ազգային մրցունակության հիմնադրամի (ՀԱՄՀ) և «Մակքինզի ընդ քոմփնի» ընկերության միջև: Համաձայնագրերի ստորագրումից հետո ՀՀ կառավարության մամուլի կենտրոնում տեղի է ունեցել համատեղ մամուլի ասուլիս:
Համաձայնագրերից մեկը վերաբերում է ուռուցքաբանական ներհիվանդանոցային կենտրոնի ստեղծման ներդրումային ծրագրին: Ըստ համաձայնագրի նախատեսվում է ստեղծել ուռուցքաբանական ներհիվանդանոցային ժամանակակից կենտրոն` միջազգային չափանիշներին համապատասխան ուռուցքային հիվանդությունների ախտորոշման և բուժման նպատակով: Վերոնշյալ կենտրոնի կառուցման համար «Գլոբալ Մեդիքլ Սոլյուշնս» ՓԲԸ-ն նախատեսում է իրականացնել շուրջ 12-14 մլն ԱՄՆ դոլարին համարժեք ներդրումներ: Կենտրոնը կունենա առնվազն 150 բժշկական մահճակալ և համալրված կլինի բնագավառում առկա ժամանակակից ախտորոշիչ և բուժական սարքավորումներով: Կենտրոնի շահագործման արդյունքում կստեղծվի շուրջ 200 նոր աշխատատեղ:
Իսկ Հայաստանի ազգային մրցունակության հիմնադրամի և «Մակքինզի ընդ քոմփանի» ընկերության միջև ստորագրված համաձայնագրի շրջանակում կողմերը կմիավորեն իրենց ջանքերը՝ մշակելու Հայաստանի Հանրապետությունում մրցունակ և շարունակական օդային փոխադրումների ծառայությունների մատուցման ապահովման ծրագիր: Ինչպես նշել է ՀԱՄՀ գործադիր տնօրեն Արման Խաչատուրյանը, «Մակքինզի ընդ քոմփանի» ընկերությունը տվյալ բնագավառում մեծ փորձառություն ունի և կներկայացնի ամբողջ համակարգն առավել մրցունակ դարձնելու առաջարկություններ:
