հինգշաբթի, 29 օգոստոսի 2013
Հստակեցվել է կենսաթոշակների վճարման գործընթացը
ՀՀ կառավարության համապատասխան որոշմամբ հստակեցվել է կենսաթոշակների վճարման գործընթացը: Այս մասին ՀՀ կառավարության մամուլի կենտրոնում այսօր կայացած ասուլիսում ասել է ՀՀ աշխատանքի և սոցիալական հարցերի նախարար Արտեմ Ասատրյանը: Ըստ այդմ` թոշակների բաշխման գործընթացը կսկսվի յուրաքանչյուր ամսվա 3–րդ աշխատանքային օրվա կեսօրից հետո։
Նախարարի խոսքով՝ 2013թ. հունիսին գործարկվել է «Էլեկտրոնային կենսաթոշակ» տեղեկատվական նոր համակարգը, որը գործում է կենտրոնացված սկզբունքով, ինչն էլ հնարավորություն է տալիս հսկել տվյալներում կատարվող փոփոխությունները և ապահովել տեղեկատվության հավաստիությունը: «Էլեկտրոնային կենսաթոշակ» տեղեկատվական համակարգի ներդրմամբ էապես փոխվում են նաև ցուցակների ձևավորման տրամաբանությունն ու ընթացակարգերը:
Մասնավորապես, վճարման ցուցակը ձևավորվում է կենտրոնացված կարգով, էլեկտրոնային եղանակով տրամադրվում է տարածքային բաժնին՝ տպագրելու և «Հայփոստ» ՓԲԸ-ի բաժանմունքներին տրամադրելու համար, իսկ անկանխիկ եղանակով վճարում իրականացնելու նպատակով՝ փոխանցվում են միանգամից բանկերին: Եվ այսպես, տվյալ ամսվա 1-ին աշխատանքային օրը ավարտվում է ստացված դիմումների մշակումը, 2-րդ աշխատանքային օրը ձևավորվում են վճարման ցուցակները և փոխանցվում են տարածքային բաժիններին և 3-րդ աշխատանքային օրը` կեսօրից հետո սկսվում են վճարումները:
