հինգշաբթի, 3 հոկտեմբերի 2013
Պետական պարտատոմսերի տեղաբաշխումից ստացված միջոցները նախատեսվում է օգտագործել մի շարք ուղղություններով
Հայաստանի թողարկած 700 մլն ԱՄՆ դոլար ծավալով պետական պարտատոմսերի տեղաբաշխումից ստացված միջոցները նախատեսվում է օգտագործել մի շարք ուղղություններով: Մասնավորապես, այն կուղղվի ռուսական 500 մլն ԱՄՆ դոլարի վարկի գծով առկա պարտքի վաղաժամկետ մարմանը: Այս մասին ՀՀ կառավարության մամուլի կենտրոնում այսօր` նիստից հետո կայացած մամուլի ասուլիսում հայտնել է ՀՀ ֆինանսների նախարար Դավիթ Սարգսյանը:
Նա նշել է, որ տվյալ գործառնության արդյունքում որակապես կբարելավվի ՀՀ կառավարության արտաքին պարտքի պորտֆելը, մասնավորապես կնվազեն լողացող տոկոսադրույքով տրամադրված վարկից բխող ռիսկերը:
Դ.Սարգսյանը նաև նշել է, որ միջազգային չափանիշներով Հայաստանն այլևս աղքատ երկրների խմբում չէ. փոխադրվել է միջին եկամուտ ունեցող երկրների խումբ: Ըստ նախարարի՝ դա նշանակում է, որ միջազգային ֆինանսական կազմակերպությունները Հայաստանի Հանրապետությանը արտոնյալ պայմաններով վարկեր ավելի քիչ են հատկացնելու: «Սա նշանակում է, որ առաջիկա 3-5 տարիների ընթացքում Հայաստանի Հանրապետությունը արտոնյալ ֆինանսավորում չի ստանալու և պետք է ինքնուրույն հայթայթի իր ֆինանսավորումը միջազգային շուկաներում»,-ասել է Դավիթ Սարգսյանը:
