Հայաստանի Հանրապետության Կառավարություն

Լսել աուդիոնյութը

ՀՀ կառավարության մամուլի կենտրոնում կայացած այսօրվա ասուլիսում է ՀՀ աշխատանքի և սոցիալական հարցերի նախարար Արտեմ Ասատրյանը ներկայացրել է սոցիալական, մասնավորապես զբաղվածության ոլորտի նոր քաղաքականությունը: Նա նշել է, որ պետբյուջեից զբաղվածության ոլորտին հատկացված միջոցների մոտ 90 տոկոսը օգտագործվում է գործազրկության նպաստի վճարման համար: Ըստ նախարարի` իրականացվել է զբաղվածության ոլորտի 13 ծրագրերի ամբողջական վերլուծություն և որակական գնահատում: «Մենք ներմուծել ենք մի պարզ ցուցանիշ, որը կոչվում է կայուն զբաղվածության գործակից: Դա նշանակում է, որ զբաղվածության ոլորտում իրականացվող որևէ ծրագրում ընդգրկված անձը, ծրագրի ավարտից հետո պետք է աշխատանք ունենա: Նախորդ տարիների ծրագիրը գնահատելիս մենք նախատեսել ենք առնվազն 6 ամիս ժամանակահատված»,-ասել է Ա.Ասատրյանը: Նախարարը նշել է, որ նախորդ տարիներին իրականացաված ծրագրերի այդ ցուցանիշը կազմել է 10,5 տոկոս, ինչը նշանակում է, որ 100 անձից 10-ն է զբաղվածության որևէ ծրագրում ընդգրկվելուց հետո աշխատաշուկայում տեղ գտել և դարձել զբաղված:
«Գործազրկության նպաստի պարագայում այդ ցուցանիշը կազմել է 6 տոկոս: Այսինքն` դա նշանակում է, որ գործազրկության նպաստին հատկացված միջոցների 94 տոկոսը ձևակերպված նպատակին չի ծառայել: Այսինքն` ծրագիրը իր նպատակին չի ծառայում»,-նշել է նախարարը:
Ա.Ասատրյանի խոսքով` այս ժամանակահատվածում մշակվել է համապատասխան օրենքի նախագիծ, որը ներկայացվել է ԱԺ քննարկմանը: Ըստ նրա` նոր օրինագծով ամրագրվել են բոլոր ծրագրային ուղղությունները, նպատակները:
«Իսկ նպատակը շատ պարզ է`աշխատաշուկայում անմրցունակ անձին դարձնել ավելի մրցունակ և աշխատաշուկայում ապահովել նրա զբաղվածությունը: Եթե մենք խոսում ենք սոցիալական աջակցության ` նպաստների մասին, ապա դրա համար սոցիալական պաշտպանության ոլորտում ունենք անապահովության գնահատման համակարգ, ընտանեկան նպաստ ծրագիր»,- նշել է Ա.Ասատրյանը, հավաստիացնելով, որ զբաղածության ծրագերը չեն պակասելու:
Նշվել է նաև, որ նախատեսվել է ծրագիր, որով ենթադրվում է փոխհատուցել աշխատանք փնտրող անձի գործատուի մոտ այցելության ծախսերը: