հինգշաբթի, 30 հունվարի 2014
Ոռոգման խնդիրները լուծելու նպատակով կկառուցվեն 4 ջրամբարներ
ՀՀ կառավարության այսօրվա նիստում հավանության է արժանացել «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու օրինագիծը: Ըստ այդմ, առաջարկվում է ժամանակավոր` մինչև 2019թ. հունվարի 1-ը Սևանա լճից ջրի բացթողնման տարեկան չափաքանակը ներկայիս 170 մլն խորանարդ մետրի փոխարեն սահմանել առավելագույնը 240 մլն խորանարդ մետր` կախված լճից սնվող Հրազդան գետի, Ապարանի, Ազատի, Մարմարիկի ջրամբարների ջրատվության աստիճանից:
Ինչպես նիստից հետո ՀՀ կառավարության մամուլի կենտրոնում կայացած մամուլի ասուլիսում նշել է ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը, նախագծի ընդունումը պայմանավորված է, մասնավորապես, Արարատյան հարթավայրի որոշ շրջաններում անցած տարիներին արձանագրված սակավաջրությամբ և այդ հողատարածքների ոռոգումն ապահովելու անհրաժեշտությամբ:
Ըստ նրա` առկա խնդիրը մեղմելու նպատակով առաջիկա տարիներին նախատեսված են մի շարք միջոցառումներ, մասնավորապես, կիրականացվեն խոշոր ջրամբարաշինական չորս ծրագրեր: «Ե՛վ Սևանի մակարդակի բարձրացման միտումը, և՛ իրականցվելիք միջոցառումները մեզ հույս են տալիս ենթադրելու, որ կարողանալու ենք այդ խնդիրը հաղթահարել մինչև 2019 թ.»,- ասաց Ա. Անդրեասյանը:
