երեքշաբթի, 18 փետրվարի 2014
Ներկայացվել են ՄՄ-ին անդամակցելու նպատակով ՀՀ էկոնոմիկայի նախարարության իրավասությունների շրջանակներում իրականացվող աշխատանքները
ՀՀ կառավարության մամուլի կենտրոնում այսօր տեղի է ունեցել մամուլի ասուլիս` Մաքսային միությանն անդամակցելու նպատակով ՀՀ էկոնոմիկայի նախարարության իրավասությունների շրջանակներում իրականացվող աշխատանքների վերաբերյալ: Ասուլիսի բանախոսներն էին ՀՀ էկոնոմիկայի նախարարի տեղակալ, Ոչ սակագնային հարցերի կարգավորման հարցերով աշխատանքային խմբի և Արդյունաբերական հարցերով աշխատանքային խմբի ղեկավար Տիգրան Հարությունյանը և ՀՀ էկոնոմիկայի նախարարի տեղակալ,
Սակագնային կանոնակարգման աշխատանքային խմբի և Առևտրի համաշխարհային կազմակերպության և երրորդ երկրների միջև առևտրային քաղաքականության հարցերով աշխատանքային խմբի ղեկավար Գարեգին Մելքոնյանը:
Ինչպես նշել է Գարեգին Մելքոնյանը,
ՀՀ էկոնոմիկայի նախարարությունը կազմել է առավել զգայուն ապրանքների ցանկը, որոնց ներմուծման դրույքաչափերը 3-րդ երկրներից նպատակահարմար չէ բարձրացնել: Ըստ նրա` ցանկը կազմված է շուրջ 900 անուն ապրանքներից, սակայն դեռ ճշգրտումներ են արվում:
«Դիմում եմ մասնավոր ընկերություններին, բոլոր շահագրգիռ կառույցներին, որպեսզի ներգրավվեն քննարկումներում»,- նշել է Գ.Մելքոնյանը` հավելելով, որ էկոնոմիկայի նախարարության պաշտոնական կայքում հրապարակել են և Հայաստանի, և Մաքսային միության մաքսատուրքերը:
ՀՀ էկոնոմիկայի փոխնախարար Տիգրան Հարությունյանը հայտնել է, որ մարտի 10-ին Երևանում կկազմակերպվի աշխատանքային հանդիպում ոչ սակագնային կարգավորման մասով Եվրասիական տնտեսական հանձնաժողովի մասնագետների հետ: Հանդիպմանը կքննարկվեն աշխատանքային խմբի գործունեության արդյունքում առաջացած խնդիրները և «ճանապարհային քարտեզով» նախանշված հետագա գործողությունները:
