ուրբաթ, 21 փետրվարի 2014
ՄՄ անդամ երկրների միջև ձևավորվել է մրցակցային սկզբունքերի և կանոնների համաձայնագիր
ՀՀ կառավարության մամուլի կենտրոնում տեղի է ունեցել հերթական մամուլի ասուլիս` Մաքսային միությանն անդամակցելու նպատակով
ՀՀ էկոնոմիկայի նախարարության և ՏՄՊՊՀ իրավասությունների շրջանակներում իրականացվող աշխատանքների վերաբերյալ: Ասուլիսի բանախոսներն էին ՀՀ էկոնոմիկայի գլխավոր խորհրդական. Հակադեմպինգային քաղաքականության հարցերի աշխատանքային խմբի ղեկավար Արա Պետրոսյանը, ՀՀ էկոնոմիկայի նախարարության մտավոր սեփականության գործակալության պետի տեղակալ, Մտավոր սեփականության հարցերի աշխատանքային խմբի անդամ Անդրանիկ Խաչիկյանը, ՀՀ տնտեսական մրցակցության պաշտպանության պետական հանձնաժողովի նախագահի տեղակալ, Մրցակցության հարցերի աշխատանքային խմբի ղեկավար Պավել Ղալթախչյանը:
Ինչպես նշել է Պ.Ղալթախչյանը, Մրցակցության միասնական սկզբունքների և կանոնների համաձայնագրի նպատակը կողմերի միասնական մրցակցային քաղաքականության ձևավորումն է: Ըստ նրա` համաձայնագրով նախատեսվում է բացահայտել և կանխել կողմերի տարածքում հակամրցակցային գործողությունները, ինչպես նաև անդրսահմանային շուկաների մրցակցության վրա բացասաբար անդրադարձող գործողությունները:
Ա. Պետրոսյանը նշել է, որ Հատուկ պաշտպանական, հակագնագցման (դեմպինգ) և փոխհատուցման միջոցների ոլորտում կատարվել են մի շարք աշխատանքներ` Մաքսային միությանը Հայաստանի անդամակցության ճանապարհային քարտեզով նախատեսված միջոցառումներից բխող: Մասնավորապես, ուսումնասիրվել են ճանապարհային քարտեզում ներառված այն իրավական ակտերը, որոնց ՀՀ-ն պետք է միանա ՄՄ անդամակցելու պահից:
Ինչ վերաբերում է մտավոր սեփականության ոլորտին, ապա անհրաժեշտ է, որ Հայաստանը միանա նաև երկու համաձայնագրերի` 2010թ. դեկտեմբերի 9-ի մտավոր սեփականության իրավունքների պահպանության և պաշտպանության բնագավառի կարգավորման միասնական սկզբունքների և 2010թ. մայիսի 21-ի ՄՄ անդամ երկրների Մտավոր սեփականության օբյեկտների միասնական մաքսային գրանցամատյանի մասին: Անդրանիկ Խաչիկյանը հայտնել է, որ Մտավոր սեփականության բնագավառի կարգավորմանը վերաբերող հիմնական սկզբունքները սահմանված են մի շարք միջազգային պայմանագրերով, որոնց անդամակցում են ինչպես ՄՄ անդամ երկրները, այնպես էլ Հայաստանի Հանրապետությունը:
