հինգշաբթի, 27 փետրվարի 2014
Արարատյան դաշտավայրում իրականացվում են ջրօգտագործման խնդիրների հետ կապված միջոցառումներ. ՀՀ բնապահպանության նախարար
Արարատյան դաշտավայրում ՀՀ բնապահպանության նախարարությունը իրականացնում է ջրօգտագործման խնդիրների հետ կապված միջոցառումներ: Այդ մասին ՀՀ կառավարության նիստից մամուլի կենտրոնում կայացած ասուլիսում հայտնել է ՀՀ բնապահպանության նախարար Արամ Հարությունյանը` «Արարատ ցեմենտ» գործարանի հետ կապված վերջին մեկնաբանությունները համարելով անհիմն և անհեթեթ:
«Մենք բազմաթիվ անգամ հայտարարել ենք, համայնքներում, մարզպետարաններում քննարկումներ ենք կատարել և ներկայացրել այն ծրագիրը, որն իրականացնելու ենք: Մենք երկու մարզում` Արարատի և Արմավիրի, անցկացրել ենք տարբեր հանդիպումներ ջրօգտագործողների հետ, ներկայացրել ենք խնդիրը, ձեռք ենք բերել պայմանավորվածություններ»,-ասել է նախարարը:
Ըստ Ա.Հարությունյանի` «Արարատ ցեմենտ» գործարանի կողմից 2013 թվականի դեկտեմբերին նախարարություն ներկայացրած տեղեկատվության համաձայն, գործարանն արտադրական նպատակով գործունեություն չի ծավալում: «Ոռոգման սեզոնն էլ դեռևս չի սկսվել, այդ իսկ պատճառով մենք թեստային անջատում ենք կատարել: Դրա արդյունքում մենք հայտնաբերել ենք մի շարք անօրինական ջրօգտագործողներ, այդ թվում նաև ձկնաբուծական տնտեսություններ»,-նշել է նախարարը:
