հինգշաբթի, 27 մարտի 2014
Մինչեւ 2017թ.-ը Հայաստանում նախատեսվում է ստեղծել 60 000 նոր աշխատատեղ
ՀՀ կառավարությունն այսօրվա նիստում հավանության է արժանացել Հայաստանի 2014-2025թթ. հեռանկարային զարգացման ռազմավարական ծրագիրը: Ինչպես նիստից հետո ՀՀ կառավարության մամուլի կենտրոնում կայացած ասուլիսում նշել է ՀՀ էկոնոմիկայի նախարար Վահրամ Ավանեսյանը, երկարաժամկետ այս ծրագիրն ունի երեք խոշոր նպատակ: Ըստ նախարարի` ծրագրի հիմնական նպատակներից է զբաղվածության խթանումը` բարձր վարձատրվող աշխատատեղերի ստեղծման ճանապարհով: «Նախատեսվում է մինչեւ 2017 թվականն ունենալ շուրջ 60 000 նոր աշխատատեղ»,-ասել է Վ.Ավանեսյանը:
Բացի այդ, ծրագրով նախատեսվում է նվազեցնել աղքատությունը: «Ծրագրի երկրորդ խնդիրը Հայաստանի Հանրապետությունում սոցիալական, պետական եկամտային քաղաքականության միջոցով շարունակաբար նվազեցնել աղքատությունը: Աղքատության նազեցման ցուցանիշները ծրագրում նույնպես թիրախային են ներկայացված »,-ընդգծել է նախարարը:
Ծրագիրը կառավարությանը հնարավորություն է ընձեռելու միավորելու ազգային կարողությունները երկրի երկարաժամկետ զարգացման տեսլականի ձևավորման շուրջ` հաշվի առնելով ձեռք բերված փորձը, առկա պայմաններն ու համընդհանուր զարգացման մարտահրավերները:
