Հայաստանի Հանրապետության Կառավարություն

Լսել աուդիոնյութը

Կառավարության նոր որոշմամբ ՓՄՁ ոլորտի հարկ վճարողների առանձին խմբերի համար նոր սերնդի ՀԴՄ-ները 2014 թ. հուլիսի 1-ի փոխարեն կներդրվեն ս.թ. օգոստոսի 1-ին, հոկտեմբերի 1-ին և 2015 թ. հունվարի 1-ին: Այս մասին այսօր ՀՀ կառավարության մամուլի կենտրոնում կայացած մամուլի ասուլիսի ընթացքում լրագրողներին տեղեկացրել է ՀՀ ֆինանսների նախարարի տեղակալ Արմեն Ալավերդյանը: «Ելնելով փոքր ու միջին ձեռնարկատիրության զարգացումը խթանելու անհրաժեշտությունից և կարևորությունից՝ կառավարությունն ընդունել է նոր սերնդի ՀԴՄ-ների ներդրման և´ ժամկետի, և ֆինանսական առումով նպաստավոր որոշում», - ընդգծել է Արմեն Ալավերդյանը: Բանախոսի ներկայացմամբ՝ ՓՄՁ ոլորտի հարկ վճարողներին թույլատրվել է ՀԴՄ-ները ձեռք բերել տարբերակված գներով, ընդ որում՝ սահմանամերձ գյուղերի համար ՀԴՄ-ներն անվճար են, իսկ այլ գյուղերում՝ տարբերակված գների 50 տոկոսի չափով: Նշենք, որ ՀՀ կառավարության 2013 թ. սեպտեմբերի 5-ի «Հսկիչ-դրամարկղային մեքենաների միջոցով օրվա ընթացքում իրականացված դրամական հաշվարկների հանրագումարի մասին տեղեկությունները ցանցային կապի միջոցներով հարկային մարմին ուղարկելու պարտադիր ժամկետները սահմանելու մասին» որոշման համաձայն՝ ՓՄՁ ոլորտի հարկ վճարողների համար նոր սերնդի ՀԴՄ-ների ներդրումը պարտադիր էր 2014 թվականի հուլիսի 1-ից: Նոր որոշմամբ գործադիրը հետաձգել է նշված ժամկետը և տարբերակել ՓՄՁ ոլորտի հարկ վճարողներին ըստ առանձին խմբերի: