Հայաստանի Հանրապետության Կառավարություն

ՀՀ կառավարությունը հավանություն է տվել «Հայաստանի Հանրապետությունում պրոբացիոն ծառայության ներդրման հայեցակարգին: Նիստից հետո կառավարության մամուլի կենտրոնում այսօր կայացած ասուլիսում ՀՀ արդարադատության նախարար Հովհաննես Մանուկյանը ներկայացրել է պրոբացիոն ծառայության հիմնական խնդիրներն ու նպատակները: Ըստ այդմ, պրոբացիայի կիրառումը ենթադրում է ազատազրկման վերականգնողական արդարադատության գաղափարախոսություն, որի էությունը ազատազրկման այլընտրանքային միջոցներով պատժի նպատակներին հասնելն է: Պրոբացիայի ծառայության հիմնական խնդիրներն են՝ կատարել ազատությունից զրկելու հետ չկապված պատիժները, նպաստել հանցանք կատարած անձի ուղղմանը հասարակությունում, սոցիալական արդարության վերականգնմանը, հանցանք կատարած անձի վերասոցիալականացումը և այլն: Ըստ հայեցակարգի, այդպիսի ծառայություն է ստեղծվելու ՀՀ արդարադատության նախարարության կազմում: