Հայաստանի Հանրապետության Կառավարություն

ՀՀ կառավարության այսօրվա նիստում փոփոխություններ և լրացումներ է կատարվել որոշումներից մեկում, որի համաձայն կփոխհատուցվեն սոցիալապես անապահով շուրջ 105 հազար ընտանիքի էլեկտրաէներգիայի սակագնի բարձրացմամբ պայմանավորված լրացուցիչ ծախսերը:
ՀՀ կառավարության մամուլի կենտրոնում նիստից հետո կայացած ասուլիսում ՀՀ աշխատանքի և սոցիալական հարցերի նախարար Արտեմ Ասատրյանը նշել է, որ Հանրային ծառայությունները կարգավորող հանձնաժողովի տվյալներով յուրաքանչյուր ընտանիք միջինում ամսական սպառում է 200 կՎտժ էլեկտրաէներգիա. ձմեռային ամիսներին` 325, իսկ ամառային ամիսներին` 180:
Ըստ այդմ, էլեկտրաէներգիայի սակագինը 6,93 ՀՀ դրամով բարձրանալու արդյունքում ընտանիքի համար միջին ամսական լրացուցիչ ծախսը, միայն էլեկտրաէներգիայի սպառմամբ պայմանավորված, կկազմի շուրջ 1,400 ՀՀ դրամ: Որոշման նպատակն է աղքատ ընտանիքներին փոխհատուցել էլեկտրաէներգիայի սակագնի բարձրացմամբ պայմանավորված սպառման ծավալների մեծացումը և հնարավորինս աջակցել, կանխել աղքատության խորացումն այդ ընտանիքների համար: Այսպիսով, կենամակարդակի բարձրացմանն ուղղված նպաստների միջին ամսական չափը կբարձրանա 2000 դրամով: